Jazema Hangero 

Omunavinangongo wehi ra Tjikume Kaoko, Esegiël Maniki Mburura, wovinangongo, wa yandja ombinika yoruhoze kotjiwaṋa tja Kondomboro. 

Omayuva tji ya ri 8 komueze outjavari wombura ndji, ehi ra Kavakovere rozombwa za Kuzema ra wirirwe i yotjikamba otjizorondu kombunda yaingwi ngwari ihe yotjiwaṋa omurwe ohongora wotjirwa tjongutukiro tjehi retu Onamibia tja pimbisire omuinyo we ku na imbwi weyuru. 

“Tjootjiri omuatje wa ire ngwi wa Kondomboro omuzanduzandu movazandu ovakwao potumayovi arikana oviṋa tji vya rara navi ngwari mehi ndi ingwi ererona ndina ndi ha kotoka ngwa pitira pokati komarama wa Katjikururume Hosea wa Kuṱako na pewa okati kutja ma yende mouye ma kakuture ehi ndi ezorondu ewa novandu varo na tjiti nao pu pe tjita omuatje omuzandu kanyama kozonguvi.” 

Mburura komurungu ma huhumiṋa omuhepundu, Mama Kovambo Nujoma, Utoni Nujoma notjiwaṋa atjihe otjiṱisiwa tjoruhoze tjomuingona Samuel Daniel Shafiishuna Nujoma, Operesidenda Ondegandenga nu ihe yOtjiwaṋa, kokutja opuwo avihe ovitjitwa vya Ndjambi, ongwe tu pa nu ongwe tu yeka. “Kanawa okuriyandja koruhoze ndu hi nondjandero, ngatu zemburuke ouwa mbwe tu ungurira. Tjinene ngatu kondje okuṱizasana otjovandu vehi rimwe nungwari atu ha pizuka nokuhumbasana kombunda omairo we. Mukuru Ndjambi Musisi Karunga nge tu pe omasa tu yakure onḓiro yomukwetu ngu he tji ri pamwe na eṱe rukwao,” Mburura ma huhumiṋa. 

Okuzemburuka omundu wa Kahao Ngandjera ingwi woruyezu ongumba omukweyuva, omuatje wovandu mba mbe rikandera ozongombe ovakazendu aeri pu ve ri, ouzandu kau pasanewa u ri owa Haipanḓa. Mburura wa perendere otjinangongo nu ma zeri okutjiyandja kozonganda zomapwikiro noviṱiziro vyomakuruhungi kokutja ekuruhungi noundu we au ha zembwa ko kaparukaze.