Auleria Wakudumo
Ehangano loNamWater ola tokola okulongifa omunino wakula womeva pokati kOgongo nOshakati keemiliona N$240. Pefimbo ta shaina omukanda dimino nehangano olo tali ka kwafela okutunga omunino mOvenduka oshivike sha djako, NamWater okwa shiivifa kutya oshimaliwa itashi ka tunga ashike ndele otashi ka tungulula, tashi ka fitika nokuninga omalunduluko aeshe a pumbiwa okutunga ominino da kulupa.
Oproyeka aishe vati otai pula ongushu yeemiliona N$240, ya kwatela mo opaipi ipe youle weekilometa 53, tai yi ponhele yopaipi ikulu ya kulupila noya liikapo kedu oyo vati hai imbi paife omeva a tondoke nawa momunino okufika koitopolwa ya yooloka konooli yoshilongo.
Omukulunhuwiliki woNamWater Abraham Nehemia okwa holola ta ti NamWater okweli longekida okuandjaneka omeva ongushu koitopolwa aishe yokoushai oshoyo modoolopa.
Nehemia okwati okulundulula ominino dakulupa, otaku kwafele okuandjaneka omeva ongushu noupu koitukulwa aishe yoshilongo. Nehemia okwati ominino dipe otadi kwafele yoo okukwatelapo ekunguluko lomeva meedula tadiya konooli yoshilongo.
“Oproyeka eyi otai kwashilipaleke eandjaneko lomeva koitopolwa yokonooli opo ku kandulwepo enhota oshoyo exumokomesho mokutunga ominino domeva,” Nehemia ta ti.
Nehemia okwa holola yoo olupandu kepangelo eshi la kwafela oproyeka ei mokupitila moprograma hai ifanwa Namibia Water Support Programme 1 (NWSSP 1).
“Elundululo lominino domeva otali kwafele okukalekapo eandjaneko lomeva moitukulwa. Omunino ukulu owa tungilwe momudo 1978, wetu longela oule wefimbo alishe olo ashike paife owa kulupa osho sha eta u tope peenhele dihapu nomeva taa patwa oikando ihapu,” Nehemia ta ti.
Okudja nee eshi vati va mona omhumbwe yokulundulula ominino, NamWater okwa tofa eenhele odo dina ominino da kulupa unene, mwa kwatelwa “Class 6”, elyenge pokati keekilometer 35 no 52 momunino waNamWater, olo vati la lika po filufilu.
Nehemia okwati kutya natango omunino uli eekilometa 15 wadja kOnambira fiyo Oshakati owa pula NamWater opo a shunife pedu onhapo yomeva fiyo opo 1.8 molwaashi inai kola. Eshi vati osha eta opo NamWater a kale ina wanifapo eudaneko laye loFY2030/31.
Oupyakadi aushe ou NamWater okwa holola kutya owa kandulwapo eshi va ndulukapo omangela yokulundulula ominino, va kufemo ominino dikulu nokutulamo dipe medu.
NamWater okwati okwa duluka omangela ei okudja mo15 Januali fiyo 22 Malitsa odula ei.
Elongo lomunino okundja kOgongo fiyo Oshakati loule weekilometa 19.7 ola pewa ehangano lovaChina hali ifanwa China Gezhouba Group Company Ltd, ongushu yeemiliona N$88, omunino okudja kOshikuku fiyo Onangombe, eekilometa 14.0, ola pewa ehangano lovaChina hali ifanwa China Jiangxi Economic and Technical International Corporation Ltd, tau tungwa kongushu yeemiliona N$67.
Omanga omunino okudja kOnangombe fiyo Oshakati una eekilometa 17.9, wa pewa ehangano hali ifanwa New Era Investment Origin Water Construction Group, tau tungwa keemiliona N$80.
Omaudafano aushe a ningwa pokati komahangano atatu okwa teelelwa vati a kale a longa oilonga yongushu oule weemwedi 12.
Pefimbo NamWater ta shaina edimino nomahangano atatu, ehangano lovaChina oChina Gezhouba Group okwa holola etumba okukwafela oshitopolwa shomeva moNamibia.
Omahangano aeshe okwa kwashilipaleka kutya otama ka longa noudiinini opo va longe etepo ominino domeva dongushu.