OHANGWENA – Ofamili novakwashiwana onghela okwa li va ngudumana pomhangulilo yaMengestalata waHangwena tava pula opo omupolifi Dimbulukeveni Namhila ou vati a dipaa Eliud Shilongo Hamukwa aha pewe elifutilemo.
Hamukwa okwa yashwa nokuxulifila moshipundi shololi pefimbo opo. Oshiningwanima eshi osha ningwa omwedi wa dja ko peinda lopolifi pOnhuno moshitukulwa shaHangwena efimbo loufiku.
Namhila oo a kala modolongo okudja mefiku loshiningwanima, okwa holoka onghela momhangu lwoshikando oshititatu, omo natango a anyenwa elifutile mo moshibofa shaye osha undulilwa komafiku 23 Juli, kuyandjwe natango efimbo lomakonaakono opolifi.
Ofamili okwa li ya holoka momwaalu muhapu ya nyika oluhodi tai imbi omaimbilo kutya ova hala omwenyo waHamukwa.
Ina yaHamukwa, Loide Shilomboleni omukalimo womomukunda Omungwelume, pefimbo a holoka komhangu onghela okwa ti fiyo opapa ina mona ovapolifi va ya keumbo laye okukundafana kombinga yoshikumungu eshi.
“Opo ashike twa fudike okaana kange ashike fiyo opapa inandi lombwelwa kutya oka dipayelwa shike,” ta ti.
Okwa pula omhangu opo i longife ouyuuki pehe na ouyelele tau holekwa ile Namhila ta amenwa.
“Ohandi lipula efimbo keshe omona wange. Ihandi kofa vali shaashi Shilongo okwa dipawa ehe na etimba,” ta ti.
Shilomboleni okwa ti kashipu okukanifa omona woye eshi a yashwa nondjebo lwoikando iheyali.
Ofamili oya nyenyeta tai ka shilipaleka pauyuuki eshi omutamanekwa ou ta holoka momhangu lwoikando ihapu shaashi okwa wana okupewa ehandukilo laye diva.
“Omunhu okushivike kutya okwa dipaa. Omhangu otai ende kashona okuyandja ehandukilo,” umwe womovakwapata James Ndengu ta ti.
Okwa nyenyeta ta ti ovanhu vamwe ngeenge va longa oimbuluma oibofa yavo ohai undulilwa komafiku okokule.
“Otwa lululilwa kovapolifi tava dipaa ovanhu vehe na ondjo. Ovapolifi okwa li va wana okutu a mena ashike paife otave tu dipaa,” ta ti.
Tulela Hamukwa (8) okaana kanakufya Eliud Shilongo Hamukwa oo vati a dipawa komupolifi oka pula epangelo opo liha yandje elifutilemo komufekelwa medipao laxe.
“Paife onda ninga ofiye shaashi omupolifi a dipaa tate,” ta ti.
Ofamili oya ti oye lipyakidila noohahende opo va dule okufutifa ouministeli woikwameni, omataulikilo okeengaba neameno.
-fhamalwa@nepc.com.na