Auleria Wakudumo
Oshakati – Opolifi moshitukulwa shaShana oya kunghilila ovakalimo vomOshakati nomOngwediva opo va xulife po okukwata, okulanda nokulandifa osho yo okulya eeshi odo da kwatwa metale lohanya.
Opolifi oya kunghilila ovakwashiwana eshi vati ovanhu ve fike pomwaalu inau didilikwa natango va tulwa moipandeko eshi vati va hangwa tava kwata eeshi metale lohanya li li konima yokamba yovakwaita mOshakati.
Omupopiliko wopolifi moshitukulwa shaShana, Frieda Shikole okwa holola kutya opolifi melongelokumwe novanambelewa vouministeli womodingonoko ova tula moipandeko oonakuningwa oihakanwa ava Omaandaxa oufiku.
Shikole okwa holola yo kutya oonakuningwa oihakanwa ova taalela oshibofa shokukwata eeshi inadi pitikwa. Kashi li oshikando shotete ovakwashiwana unene vomOshakati tava kwatwa ile tava kunghililwa opo va xulife po okukwata eeshi da dja metale lohanya.
Eeshi da kwatwa mohanya kadi na oundjolowele,notadi dulu okweetela omikifi ngaashi oshimela, onghungo osho yo omukifi woCholera.
Ovakwashiwana ova kunghililwa yo va xulife po okulanda eeshi odo tadi landifwa momapandaanda aShakati shaashi dihapu otadi di metale lonyata.
Nonande Shihenga Shanangobe ya etelela eeshi, eenhangu nomashale mahapu neudo, oshiwana onghene tashi tauluka omilandu doundjolowele nodouministeli womidingonoko.
Ovakwashiwana otava kunghililwa opo va kotokele okulanda eeshi unene odo ditalala kutya opomatala aShakati ile movakwashiwana.