ETUNDA – Omupresidente Netumbo Nandi-Ndaitwah okwa pula oovene vomapya e li koshi yomeva efundja opo a shangwe nelalakano lovanhu va ka pewe omakwafo oikulya.
“Inandi hala ovanhu tava longifa oulingilingi pefimbo lokushanga omadina oovene vomaumbo. Ovanhu ashike ovo va ninga oihakanwa yefundja va pumbwa okushangwa,” ta ti.
Edi Nandi-Ndaitwah okwe di popya pefimbo a talela po ovanhu va ninga oihakanwa ve li keetenda kEtenda koshitukulwa shaMusati Olomakaya.
Efiku tuu olo natango, Omupresidente okwa talela po oitukulwa ya dengwa kefundja ngaashi Oshana nOhangwena.
Omupresidente okwa li a etela oshiwana omaano oikulya, omakumbafa neefewa.
Oshiwana okwa li sha hafa shi udite etumba okumona Omupresidente wavo womukainhu lwoshikando shotete. Nandi- Ndaitwah okwa lombwela oshiwana ta ti epangelo ole lilongekida okukala la yambidida ovo va ninga oihakanwa yefundja.
“ Pamwe neeminista dange nOmupilima ohatu ka kwashipaleka kutya ovanhu ve li keetenda ova pewa oikulya, omakumbafa, eenete deemwe noundjuwo,” ta ti.
Okwa ti ookansela nava pule ovanhu tava dulu okuninga oundjuwo wopokafimbo tau dulu okulongifwa keetenda molwaashi osha fimana ngeenge ovanhu tava longifa okandjuo.
Omupresidente okwa yelifa ta ti ota ka kufa moilonga ovanhu ovo itava longo oilonga yavo.
“Ngeenge ito wanifa po oilonga yoye ohandi ku kufa moilonga. Onda hala ovanhu tava longo nondjungu okuyandjaneka omayakulo koshiwana,” ta ti.
Okwa ti Ovanamibia ove mu pa eenghono dokuninga Omupresidente onghee oku na oufemba wokukufa omunhu moilonga.
“Naame ngeenge itandi wanifa oilonga yange Ovanamibia ove na oufemba wokukufa nge moilonga shaashi ovo va hoolola nge,” ta ti.
Okwa pandula ookansela, oongoloneya nomalelo opamifyuululwakalo eshi va longela kumwe okuyambidida ovanhu va ninga oihakanwa yefundja.
Omupresidente okwa lombwela oshiwana opo shi xulife po okutauluka omeva efimbo loufiku ile ngeenge tava di keendingosho molwaashi ova nyika oshiponga.
“Momeva ohamu kala omayoka ile omunhu ta dulu okutetwa komakende. Inamu tauluka vali omeva male shaashi otamu dulu okuwila momalambo,” ta ti.
-fhamalwa@nepc.com.na