Auleria Wakudumo
Omukaleliposhilongo waNamibia koAmerica Margaret Mensah-Williams okwa holola ta ti omusholondodo tau tambulafanwa komalungula woilongo nomwaalu wovanhu tava tumwa koilongo yavo okudja koAmerica kau li mondjila notau pukifa nokungwangwaneka oshiwana.
Meenghundafana naKundana, Mensah-Williams okwa ti kutya ovakalelipo voilongo aishe ova mona omukanda wadja koDepartment of Human Services (DHS), hano ombelewa hai ungaunga nokukwafa ovakwashiwana kutya ombapila ye lihanena omalungula inai shangwa kombelewa hai longo novadjaidjai (US Immigration and Customs Enforcement ICE), onghene kai li mondjila.
“Nande ongaho, ombelewa yetu oya mona ouyelele okudja kombelewa hadi ungaunga novadjaidjai kombinga yomhangela yokushuna ovadjaidjai aveshe koilongo yavo,” Mensah-Williams ta ti.
Ombelewa yaAmerica vati otai landula omulandu oo hava landula shito ngeenge tava tumu ovadjaidjai koilongo yavo.
Omulandu wavo vati owa kwatela mo okukufa ko eembapila ngaashi eepaspota kovadjaidjai ngeenge da pumbiwa, osho ha shi endele pamwe vati nelombwelo laxuuninwa okushuna ovadjaidjai koilongo yavo.
Mensah-Williams okwa weda po ta ti ombelewa yaye otai longo mekwatafano nouministeli womakwatafano okondje yoshilongo ngeenge pe ya elunduluko lasha.