Ovanaudu koshipangelo shaMuthiya itava ka kala vali ofika momutenya ngeenge ve li momukweyo molwaashi paife koshipangelo otaku tungwa etala lomudile. 

Edi odakolekwa komukulunhuwiliki wouhaku moshitukulwa shaShikoto Joshua Nghipangelwa. 

Etala otali tungwa koshimaliwa shoN$400 000. 

Okwa ti otali tungwa kouministeli wouhaku nomayakulo opashiwana konima a lombwela minista kutya ovanaudu ova pumbwa etala. “Ovanhu tava tungu etala ove li popepi nokumana paife,” ta ti. 

Okwa yelifa ta ti etala otali tungwa li na oipindi opo ovanaudu ngeenge ve li momukweyo va kale omutumba koipindi. 

Nghipangelwa okwa ti oshipangelo shaMuthiya osha taalela eshongo linene lovanaudu hava kala ashike va fikama ofika momukweyo ngeenge va teelela oku ka pangwa. 

“Natango oshi li eshongo linene pefimbo lodula molwaashi ovanaudu ohava lokwa ngeenge ve li momukweyo,” ta ti. 

Nghipangelwa okwa ti ovanaudu vamwe ohava kala va pumbwa epango lomeendelelo, vo ihava dulu okufikama efimbo lile momukweyo. 

Omukulunhuwiliki okwa ti omudo 2023 oshipangelo shaMuthiya okwa li shi na oupyakadi womeva haa pate, ashike paife omukundu ou okwa kandulwa po. 

“Otwa tula eetenga domeva moshipangelo opo di kale tadi yandjaneke omeva ngeenge eepomba da pata,” ta ti. 

Okwa ti ombelewa yaye otai lalakanene okuyandjeneka omayakulo opaunamiti koshiwana molwaashi osha fimana ngeenge ovanhu tava pangwa. 

Nghipangelwa okwa popya ta ti oilonga yokutunga osaala yokanyofi koshipangelo shaNandjokwe otai ende nawa paife. 

Ta ti yo okapangelo ke li koTsintsabis oka longululwa molwaashi okwa li ka kulupa. 

Kombinga yomukifi malaria, okwa ti oshitukulwa shaye natango onghene tuu natango taalela eshongo linene lovanhu vahapu tava kwatwa komalaria. 

-fhamalwa@nepc.com.na