Auleria Wakudumo
Ongwediva – Manga eluwa inali tenda, Erastus Medusalem omunamido 61 okwa kwata nale oxuxwa komulungu taka toola omahakashala meemwoonde daNgwediva a shiive okulandifa a wede okafilinga kopeendjela yaye.
Medusalem okwa holola kutya oha penduka alushe lwopo 05h00 lwaapo opo a tule po shopedimo omanga ineli denga elila lokukatoola omahakashala aye.
Omukalimo womOnghulumbashe mUukwaluudhi okwa menekela mOngwediva eshi a mona kutya omuna omiti domahakashala dihapu odo tadi dulu okumuetela okafilinga ka wede popeendjela yaye.
“Nonande ndina oshimaliwa shopeendjela, inashi wanena eemhumbwe dange nodovakwanedimo vange aveshe,” Mudusalem ta ti.
Medusalem okuna ounona vahamano oshoyo outekulu vahamano.
Nonande vamwe vomounona vaye va kula ngaho paife nohava dulu okunyangadala penya naapenya, Medusalem okwa ti oha tumu natango oshimaliwa kuvamwe nokukwafela onghelo yaye oyo yili mondodo onhimuwoi.
“Ohandi di yoo nameme, oo eli omukulupe weedula 90 nokwa pumbwa eefiloshisho la wedwa po onga omukulunhu eli meedula domutoko,” Medusalem ta ti.
Efiku ngeenge ola enda nawa ndele ta landifa sha kola, Medusalem okwa ti oha mono ngaho nande oN$350 fiyo opoN$450 lwaapo.
“Oshikando shotete onda landifa eeshako 10 domahakashala koN$320. Ngaho onda ninga oshako keshe ina ashike N$32,” Medusalem ta ti.
Medusalem okwa holola kutya vahapu ohava kendabala okushunifa ondado pedu osho hashi eta a landife omahakashala aye kombilixa ashike nande ongaho ita tula omutwe kepepe shaashi poima pweya ope dule apa pandja ile inapa yasha nande nande.
Omukulupe okwa ti ovalandi vomahakashala ohava ende okaenda namhadi. Okwa ti oha pa piti oivike nande ivali ile itatu ina mona nande ocustoma imwe.
Nonande pokati kOngwediva nOnghulumbashe pena oupadi, omukulupe ou oha di vati novakwanedimo moNew Reception mOngwediva manga ta longo ongeshefa yaye ei.
Medusalem oha uhala ta ongele omahakashala yee te ya okuongela momwoonde umwe uli popepi nopate opo a dule okulandifa noupu.
Oha uhala a kalela omahakashala aye konima yokutoola shaashi a tila a vakwe po kuvakwao ovo hava ningi ongeshefa ya faafana naye.
Medusalem okwa ti nonande eli moukulupe, ina hala okukala a mwena shaashi oshimaliwa shopeendjela inashi wana unene mopaife eshi keshe shimwe sha ninga ondilo.