Oshipuna shoobiliona moAngola Isabel dos Santos, shoka sha taalela omakonaakono molwa okulunga ta itapula nokudhengele ondhi peho, osha ikutha miilonga yemwene onga gumwe gwomaanani yehangano lyomakwatathano moAngola oUnitel.
Nguka okwa ti ota thigi po oshipundi shoka omolwa oku ha uvathana naaleli ooyakwawo yehangano ndoka, itaaku ya pehulilo.
Isabel omwana gwomupresidente omukulu gwaAngola Jose Eduardo dos Santos. Okwa hempululwa koshikundaneki shoForbes Magazine onga oye omukiintu omuyamba muAfrica alihe. Nguka otaku hokololwa a gongela uuyamba we sho a kala noku tapa mo omaliko gepangelo noku ga ninga gopaumwene. Angola oye oshilongo shimwe muAfrica shoka shi na uuyamba womahooli nokawe. Omukiintu nguka oku na mo oshipambu-liko shoopelesenda 25 moUnitel, ehangano ndjoka enene lyomakwatathano moshilongo ashihe.
“Konima yomimvo 20 dhokulonga ndi itula mo mekoko lyehangano ndika lyoUnitel, onda hogolola okuthiga po oshipundi onga oshilyo lyokakomitee kokulela ehangano,” osho ta ti ngaaka metiyali.
Dos Santos (47) ta ti, ota zi mo miilonga oshoka omananathano ngoka geli po, go itaaga hulu ota ga piyaganeke iilonga ye, neyo komeho lyehangano onkene oshili mondjila ngele a zi ko koshipundi.
Omaliko ge ogali ga kukutikwa muDeseba kaanonaakoni yoAnti-Corruption moAngola no ita vulu oku ka guma we manga, shoka ashili oshitopolwa shomakonaakono.
Mokati koodokumente dhoka dha yakelwa aakonaakoni, omu na ndhoka anuwa tadhi ulike kutya omwa Dos Santos nguka okwa kala ethimbo nuule ta tapa mo eliko moshilongo eli ukitha komapungulilo ngoka ge li kondje yiilongo.
Shika osha eta opo omaliko ge moshilongo moka ga kukutikwe. Ye mwene okwa li e na unene oongeshefa momakwatathano opaengodhi nosho wo moombaanga.
Epangelo lyaAngola, oshilongo shoka sha ningi oomvula muupika waPortugal, olya tokola ihe oku kukutika omaliko ge.
MuJanuali, omukiintu nguka okwa li a ningilwa omalundilo ogendji ngoka ga kwatela mo ekwato nayi lyiimaliwa yepangelo, oku lela pambambo, nokundjondja mo iimaliwa moshilongo pethimbo ndyoka ali omuwiliki gwehangano lyokulonga omahooli lyoSanongol.
Iinima ayihe mbyoka ta popilwa okweyi ipatana thilu thilu, ta ti mbika iinima teyi ningilwa molwa opolitika, ihe hamolwaashoka a ninga sha andola sha puka. Konima sho a tindilwa emangululo lyomaliko ge muJuni nuumvo kompangu, Dos Santos okwa ti okwa tindilwa uuyuki. Nguka okwa li a kutha koshipundi onga omunashipundi gwoSonangol konima owala yoomwedhi sho he a zi ko koshipundi hoka a kongele ko Joao Lourenco oye a ninge omuthigululi gwe gooshipundi shuupresidente. Lourenco sho e ya koshipundi mo2017, okwa thikile noku yaneka pomutenya oonzo dhaDos Santos nofamili ye nokwa tameke oku ya ningila omakonaakono.
-Nampa / AFP