Auleria Wakudumo
Omonamati waHelvi Kanana oo a xulifa medipao linyanyalifa mo2018 okwa ti ota dimbuluka ngonghela oshiningwanima omo a tala nghene ina ta dengaulwa nomupini wekuva komutwe fiyo omefyo kuJohannes Nanghama oo paife e na omido 43.
Moses Vatekuleni Kambo okwa li ashike ena eedula 12 pefimbo loshiningwanima.
Kamho opamwe naina yaNanghama, Rauha Sakaria, ovali vamwe vomeembangi depangelo odo dahokolola nghene Nanghama oo a li e na omunamido 32 pefimbo loshiningwanima a vati a xulifa po onghalamwenyo yaKanana momukalo tau difa omaxilili.
Ava ovali va fikama komesho Omupanguli Eduard Kessalau momhangu yopombada mOshakati mEtitatu loshivike eshi.
Nonande paife ena eedula 19, Kamho okwa ti ota dimbuluka osho shali sha ningilwa ina shaashi kali a kofa pefimbo loshiningwanima.
“Onda hangwa handi lesha monduda yetu oyo ili popepi noyameme. Ohandi dimbuluka meme etu popifila pondje manga ina ka nangala. Eshi a ya monduda, Nanghama okweya ta konghola ponduda yaye oikandfo ihapu naashi a ka yeulula po okwa hovela okumudenga,” ta hokolola.
Ta ti eshi a mona kutya ina oku li moshiponga okwa dja mo monduda a ka kwafele ina. Pefimbo a taalela omutamanekwa, okwa holola nondaka ihena oumbada kutya omutamanekwa okwe mu hevela eshi a kendabala okukwafela ina.
Okwa weda po kutya okwa shuna monduda ndele talele aishe pombululu yoipeleki yavo omo a li a nangala nokandenge oko kadalwa kuNaghama. Ta ti Nanghama okwa denga ina nomupini wokekuva fiyo ta ongotele.
Oshiningwanima eshi osha ningwa momafiku 3 Auguste 2018 momukunda Etomba moshikandjo shaEenhana.
Otaku hokololwa Nanghama vati a denga Kanana nomupini ulaula oo hau tulwa komakuva nokeembike komutwe oikando ihapu eshi ningila meumbo lanakufya.
Ina yaNanghama, okwa holola komesho yomhangu kutya itatu kumwe noumbangi oo wa yandjwa komona kutya okwali eli meumbo nounona pefimbo loshiningwanima.
Okwa ti eshi a shiivifilwa oshiningwanima eshi, okwa endelela okudja poushiinda opo ali ta ningi exupulifo shaashi okwali omudiakoni ndele ta pitula omutekulu umwe meumbo ashik eina hanga mo Nanghama. Okwa weda po yoo kutya naashi vadja koshitondoka nomutekulu ina pashukila Nanghama omesho meumbo ile a uda ta dumwa kutya okwali meumbo.
Ta popi nondaka taingangama, ina yaNaghama okwa shiivifila omupanguli Kesslau kutya ota dimbuluka a hanga nakufya a nangala natango pedu nohonde tai shisha meyulu.
Nanghama oo ali ena eedula 36 pefimbo loshiningwanima ota tamanekelwa edipao nehepeko loomeme momaumbo Okatendo 4 ko2003.
Ovashiinda vavali ovo va holoka poshiningwanima tete navo ova yandja oumbangihokololo wavo veli omhinge nanakutamanekwa.
Nanghanda okwa ti kena ondjo medipao laKanana.
Nanghnada ota kala natango moipandeko.
Oshibofa shaKanana osha kalelwa po kohahende yepangelo Aina Mwaala omanga Nanghama a kalelwa po kuMakale. Oshibofa shaNanghama oshali sha kalelewa po nale kuGrusshaber oo a tewatewa kuNangama molwa ounghundi welaka pokati kavo vati.
-wakudumoauleria@gmail.com