ONGWEDIVA – Ouministeli woikwamina neenghono owa ti kutya ondado yomahooli omwedi Juni otai ka shuna pedu.
Opetolola otai ka shuna pedu noN$0.40 yoo ondado yodisela otai u noN$1.18 moliitela.
Omunambelewa mouministeli ou Andreas Simon okwa ti ondado yomahooli koWalvis Bay itai ka lunduluka, notaa ka kala poN$19.78 moliitela.
Ondado yodisela 50ppm yo otai ka wa pedu, tai ka kosha oN$19.05 moliitela omanga odisela ei i li po10ppm nayo otai shuna pedu, tai ka ninga N$19.25.
Momushangwa wa pitifwa kouministeli, ondado yomahooli a dindwa, a longifwa muMei, oi li poUSD92.118 mondoloma imwe.
Omanga ondado yomahooli odisela 50ppm momwedi Mei oya kala po USD85.765 mondoloma, okuyelekanifwa nomwedi wa dja ko eshi ya li poUSD96.514.
Ondado yomahooli aa oya shuna pedu noUSD10 mondoloma imwe.
Ondado yomahooli odisela yo10ppm muMei 2023 oya kala poUSD87.30 mondoloma. Ouministeli owa popya yoo kutya, okudja mefiku 01 fiyo 26 Mei 2023 odola yaNamibia oya kanifa ongushu kodola yaAmerika nopaife oili li poN$18.92.
Okwa tumbulwa yoo kutya eudafano ola tulwa po pokati keeministeli edi mbali opo ovalongifi vopate vakale hava fendele 30 cents tashi futilwa okudilila momahooli. Ovalongifi vopate otava kala hava futu eesenda 178 moliitela okudja momafiku 07 Juni.
Oministeli oya popya kutya ondado yomahooli opetolola itai lunduluka, omanga ondado yomahooli odisel tai shuna pedu niisenda 80 molitela.