ONGWEDIVA – Elelo lodoolopa yaNdangwa otali ka ninga omaulikilo oipindi lwoshikando 11 okutameka omafiku 30 Apiilili fiyo 4 Mai 2024.
Omudo keshe omalelo eedoolopa ohaa ningi omaulikilo oipindi nelalakano lokueta oyuuyemo modoolopa noshoyo okueta po eemhito doilonga.
Omaulikilo oipindi okwa fimana molwaashi ohaa yambula po eedoolopa tashi pitile mokulongifa oshimaliwa tashi di moipindi noshoyo okunana ovanangeshefa tava di koitulwa ya yooloka nokondje yoshilongo.
Omupopiliko welelo laNdangwa Petrina Shitalangaho-Mutikisha okwa koleka ta ti ei oyo omhito iwa koshiwana opo shi ninge omaindilo outala vokulandifila.
Okwa ti oshiwana nashi talele po eembelewa delelo lodoolopa yaNdangwa kombinga youyelele nghene shi na okuudifa outala vokulandifila.
“Otwe lilongekida okukala twa ninga omaulikilo oipindi ponhele ya andjuka nope na eameno efimbo keshe,” ta ti.