Auleria Wakudumo
Omukulunhu welelo loshitukulwa shaHangwena Fillipus Shilongo okwa holola kutya ondjele yomeva moshitukulwa shaHangwena inai shuna natango pedu osho sha eta omwaalu wovakwashiwana ava tava yelulwa okuya keetenda u ye pombada.
Edi Shilongo okwe di holola pefimbo ta yandje olopota yonghalo yomeva komupresidente Netumbo Nandi-Ndaitwah Olomakaya mOshikango.
Shilongo okwa holola kutya efundja ola hanga oshitopolwa shaHangwena okudja mulotete laApilili neudo nondjelo yomeva inai shuna pedu fiyo onena osho sha eta omwaalu wovakwashiwana ve li keetenda u ye pombada.
“Oikandjohoololo ya divilikwa unene komeva ongaashi Oshikango, Engela, Ongenga, Endol a nOhangwena. Mopaife omikunda da dingililwa kefundja noda dja ovakwashiwana vahapu va ya keetenda ongaashi Ouhongo, Onghala B, Eengava nOimbadalunga,” Shilongo ta ti.
Shilongo okwa holola yo kutya shaashi omeva okwa ninga male momikunda edi, omatuwa novanambelewa vokutopola oikulya keesenda defundja ihava fiki ko vali. Oshiwana osha imbwa yo oku ka mona ouhaku wopaunamiti koupangelo vanini osho yo okufika kwaayo yakula.
“Nande ongaho, omadakadaka nombautu yopolifi oya fika keesenda edi opo ku kwashilipalekwe kutya ovakwashiwana ova mona omayakulo a wana po,” Shilongo ta ti.
Oshitukulwa shaHangwena oshi na eesenda heyali odo da tutilwa ovanhu molwefudja.
Molwaashi omwaalu wovakwashiwana otau ende nokuwedelwa eshi ondjele yomeva ya uka pombada, eenhele dimwe ode lihanga itadi dulu okuwanifa po oipumbiwa aishe yovakwashiwana.
Oipumbiwa
Shilongo okwa ti otava pula omakwafo kombelewa yOmuprimaminista opo i yambidide noudjuwo vopokafimbo ve li 20, eenhete dokuliamena keemwe di li 2 500, omatalashe okunangala e li 1 000 osho yo oikulya ngaashi oushako voufila wepungu, omaadi okulya, neendooxa deeshi. Oikulya nai kale vati tai dulu okuwanena ovanhu 2 000.
Ngoloneya woshitukulwa shaHangwena Sebastian Ndeitunga okwa holola kutya oshitukulwa oshi na omhumbwe youfila wepungu ile omahangu.
“Otu na oikulya ikwao ngaashi omaadi, eendooxa deeshi, eesopa naikwao ashike itatu dulu okupa oshiwana oikulya ei ihe na oufila shaashi kave na kutya otave i lifa shike,” Ndeitunga ta ti.
-wakudumoauleria@gmail.com