OSHAKATI – Omulumenhu weedula 31 oo kwali a kwatwa po molwaashi vati ha longo onga ondudu omanga e he na omukandapitiko wokulonga oilonga oyo, okwa mangululwa mEtitano, molwashi vati oshibofa shaye kashi na oumbangi wayela. 

Kaimenu Venomendu okwa li a kwatwa po mEtivali loshivike shadja ko mOshakati eshi vati a monika kutya oha yandje oimbodi nokupanga ovanhu ovo hava ka dipaa oifitukuti koshikunino shoinamwenyo Etosha National Park moukongo uhe li paveta. 

Okwa kwatwa po a hangwa meumbo laye kolukanda Evululuko mOshakati efimbo longula. 

Omukulu hu koshikondo shokukonakona oimbuluma omupedu komufala Fredrick Ndjadila okwa koleka oshiningwanima eshi. 

Okwa ti pefimbo omutamanekwa ou a holoka momhangu omupangulidjai okwa ti na mangululwe molwashi oshibofa shaye kashi na oumbangi wa yela, ashike omakonakono opolifi otaa twikile opo ku talikwe ngeenge otashi dulu okushuna komhangu. 

Otaku hokolola kutya tete manga omunhu ina ya kEtosha National Park ohava piti kondudu ndele ta pewa oimbodi nelalakano lokukala ina kwatwa po kopolifi. 

Opolifi oya hokolola tai ti ngeenge omunhu okwa aluka kEtosha natango oha piti keumbo londudu oyo ndele ta pewa vali oimbodi opo vati a kale ina monika kopolifi. 

Otaku hokololwa kutya efiku olo ondudu oya hangika noshimaliwa keemuma omaN$2 842, osho a pewa kovanhu eshi ve mu futa. 

-fhamalwa@nepc.com.na