ENGELA – Ovakainhu ve li momateelelo va kalela oshipangelo mEwalanda lokEngela ova hokolola nghene vakwao ovo va li navo mewalanda omo tuu omo va shuna komaumbo tava tauluka oyana i hadi omeva, amwe e na oule wa tetela moshiya.
Pefimbo Kundana a talela po Ewalanda Etivali ova hokolola tava ti eendjila odo hava ende ngeenge tava i komaumbo odi li koshi yomeva.
Ewalanda onhele yomuhandjo hai kala ovakainhu ngeenge ve li popepi nokupulumuna, nohai kwafele opo vaha ende oinano ile.
Alina Simon a dile komukunda Ohaingu okwa hokolola ta ti kEwalanda okwa dja nale ovakainhu vavali pomukunda wavo va pulumuna ashike ova enda moshana shomeva va humbata eehanana davo.
“Otu na oumbada nohatu lipula kutya ohatu ka enda peni ngeenge otwa pulumuna,” ta ti.
Okwa yelifa ta ti kEwalanda oku na ovakainhu vahetatu va dja komukunda wavo.
Simon okwa ti omaumbo avo inaa talama omeva molwaashi oku li pomutunda ashike okwa dingonokwa komeva.
Rauna Johannes a dile komukunda Ouhongo okwa ti kashipu komukainhu opo ashike a pulumuna ndele ota ka enda momeva nohanana yaye yefiku limwe ile yomafiku avali peke.
“Eendjila dimwe odi na omalambo. Ohatu dulu okuwila momalambo nounona vetu. Otu li moupyakadi wakula notwa pumbwa ekwafo,” ta ti.
Lina Kandume a dile komukunda Onamilunga okwa weda po ta ti naye okwa taalela eshongo linene lokuenda momeva ngeenge ta shu na keumbo.
Okwa pula opo ombelewa ya ngoloneya i longekide edakadaka noku va twala komaumbo opo ku kelelwe oiponga yovanhu tava xulifile momeva.
Oshivike sha dja ko koshitukulwa shaKunene okwa lopotwa omukainhu weedula 34 a xulifa eshi a wila momeva pamwe nokaana kaye pefimbo kwa li tava i koshipangelo.
Wilika Hatutale a dile komukunda Epolo koAngola okwa ti ita dulu vali okushuna komukunda wavo molwaashi omaumbo oku li koshi yomeva.
“Onde ya okuteelela kEwalanda opo ndi dule okukala popepi noshipangelo shaashi koAngola katu na Ewalanda,” ta ti.
Okwa didilika kEwalanda kEngela li hadi oomeme ve lihumbata va dja koAngola omanga vamwe ohava holoka momwaalu muhapu oku ka konga omayakulo ouhaku koshipangelo shaNgela.
Ovakainhu ova hokolola natango kombinga yeshongo linene omo hava nangala pedu molwaashi kEwalanda ove hadi ko.
Nonande ongaho, Ewalanda ola pewa eembete nomatalashe ina wanena ovakainhu molwaashi keshe efiku otava holoka momwaalu muhapu okuya kEwalanda.
Oomeme ova weda po tava ti ngeenge tava fetwa ohava ende keemhadi okuya moshipangelo kokanyofi osho hashi eta omafimbo amwe va monene ounona mondjila.
She likwatelela kodjo yonghundana, oya lombwela Kundana tai ti neudo okwa lopotwa ovakainhu 18 va monena ounona moixwa pefimbo kwa li ve li mondjila yokuya kokanyofi.
Minista wouhaku Dr Esperance Luvindao, Omaandaxa okwa ti kape na omukainhu ile okaana ta ka lopotwa ka xulifa pefimbo lokupulumuna.
Edi okwe di popya pefimbo kwa li a talela po oshipangelo shaKatima Mulilo.
Luvindao okwa ti ota ka longa nelitulemo okukwashipaleka kutya oomeme ve li momateelelo ova pewa omayakulo e lixwa po.
Omukulunhuwiliki wouhaku woshitukulwa shaHangwena, Robert Nandjila okwa ti ota ka tuma ovanambelewa vouhaku kEwalanda opo va twikine omashongo aa taalelwa kovanhu.