RUNDU-Kavango zoupumezuva munasipundi gondango Damian Mughambayi katente asi yina kara hepero mukutara nkenye simwe unene sinano ntani vantu vatunga moKavango zoupumezuva nokutara asi mukunda Kavangio zoupumezuva nomvhura nonzi dina pitipo omu vapira kugutara meho.
Vagendesi nomukunda edi kavatente asi mukunda horowero gwaMukwe vahepa kuguteta pavali, Mashare pavali ano Rundu Urban vahepa kugugaununa patatu ano edi nye dimwe dikare ngoroooro vahadiguma,yipo asi nadinye dahepa kukara murongo (10).
Maghambayi katente asi nampili ngomu yina kara asi mavango kwaligaunuka unene, kuna kara ngesi asi Rundu Urban zelike navagaununa pavali ano dokuhupako tadikara ngorooro moomu mwanare. Mokudipakerera, age kahundilire asi vahepa kutara asi nomukundahorowero edi ngapi dina kukura, nokutura asi vahepa kugwanekera nokomitiye ezi vapere sinka sokutarurura nomukunda omu vana pe nye epangero lyosirongo sinka sikare nye momawoko ganguuru Julius Hamunyera Hambyuka. Ose nare twagava magano getu kokomitiye zokutarurura nomukunda zo 5th mvhura zina puko asi vatare omu navavhura kugaununa nomukunda edi yipo dimwe diwape kugava sirugana kovatungimo. Nampili ngoso napa tuna kuhuyunga ngesi kapi twagwana elimbururo, age kahuyungire nonkangire nonkango edi posiruwo sokutambura nguuru gomupe sivike sina puko.
Ose kuna kuhundira asi nove oyo hamenemo mokutara asi tugwane nkumbu, mufumadekwa nguuru, nokutara asi sininke sangesi sina pumbwa kusitura melikwamo yipo tusitare momunene. Mokutetagura nomukunda monaruwa ngayininkisa turete nye yirugana eyi vana pumbwa vantu popepi eyi nayininkisa asi vatungimo womoKavango zoupumezuva vahepa kugwana mbatero ezi vana pumbwa,’’ yimo ana kutanta ngoso.
Maghambayi katente asi eturo moyirugana Hambyuka kuna wiza posiruwo sina kara asi mukunda kavango zoupumezuva kuna kara nomaudigu gomanzi aga gakara asi kwanana nomvhura dononzi. ‘’
Ruhepo, epiro yirugana, ukorokotji, ntani kupira nye matungo gana wapa, oyo yiyo yimwe tuna kugwanekera nayo. Mukunda ogu munene, nomuhoko nye guna kukura, nomukunda dimwe kapi dina kugwana uwa ou vana pumbwa yimwe kuna kara nonzira domomawiza, kugwana mema, ntani erongo lina wapa noukanguki ndi mavango gokuhakwira,’’ yimo ana kutanta. ‘’ Moomu tupu tuna yidiva asi udigu wangesi kapisi ureru kupitamo, nye ame ninahuguvara asi noumpitisili woge hawe kuvhura turetesepo malitjindjo gamwe. Kapi pana kara matamangero asi umpitisili woge nomu orugana nomukumo, nayituninkisa asi twahepa kulipakerera turugane kumwe rambangako vatungimo nawo ngosikwawo nositambo simwe tupu: nokutanta asi vantu womoKavango zoupumezuva vagwane nompito nomarunone aga navavhura kuruganesa,’’ yimo ana kuyinkondopeka ngoso. Maghambayi simpe katente asi yina kara mulyo vatungimo womomukunda asi vadive asi mulyo musinke gokulipakerera muruganene kumwe yipo mugusepo maudigu aga muna kumona.
Mukunda ogu kwangawopa momarunone, makura asi twahapata marunone gangesi kwahana kukara matungo gana gwanene ngwendi nonzira, mema ntani mambo.
Eyi kapi yina kara asi yopomberewa tupu; kuna kara asi eyi yonomfa ndi kuparuka, moomu yina kara asi kwato mema gokunwa gana zere. Age katente asi sinzi sovantu vatunga moKavango kuruganesa mema gomomukuro mukaro ogu guna kara asi kapi guna wapa kureta hena vantu vanyande koyikasama.
Eyi yimwe yina kara asi vahepa kuyirugana pangenderera. Munasipundi gondango zovakansela mukunda upumezuva kahundilire asi twahepa kuyirugana eyi pepenuno eli tuna gwana lyepe. ‘’ Turuganeni kumwe nanguuru gwetu gomupe, omu natugava magano getu gokutunga omu nye natuza komeho mokutunga ukumwe. Ame kuna kumuhundira namuvenye asi mwahepa kusiga mukaro ogu gokulitondowora ngesi tuzeni nye asi kuna hara kuza komeho. Twahepa kuhageka yigongi yomokahorehore ntani kuligamba gamba, makura tuhuyunge tupu ukumwe hawe ngano mukunda taguzi komeho ntani vantu vetu vagwane eparu, yimo ana kutanta ngoso.