Auleria Wakudumo 

Elelo lodoolopa yaNgwediva pamwe nombelewa youkaleliposhilongo yaAmerica ova tula po eudafano okutwikila nongulumambo tai ifanwa American Corner, i li mendiki loSam Nujoma Multi-Purpose Centre mOngwediva. 

Omupopiliko mombelewa youkaleliposhilongo yaAmerica Ryan Bradeen, omukulunhuwiliki wopakafimbo welelo lodoolopa yaNgwediva Rebekka Hidulika nomunashipundi wokakomitiye kelelo lodoolopa George Fabian ova shaina eudafano. 

Ongulumambo tai ifanwa oAmerican Corner oya kala mOngwediva oule weedula di dule po-11, noya kwafa vahapu oule wefimbo okukwatafana, okulihonga, nokuyambula po oshiwana unene ovanyasha, ovanangeshefa nounona vofikola. Bradeen okwa holola kutya oAmerican Corner ohai kwatakanifa omifyuululwakalo daAmerica nomifyuululwakalo doilongo ya yooloka. 

“American Corner ohai yandje omhito yokufaafaneka nokuninga omayooloko kombinga yonhumba pokati koilongo. Oto dulu okufaafaneka onghalo youhaku pokati kaAmerica naNamibia,” Bradeen ta ti. 

Bradeen okwa holola yo kutya nonande vamwe ihava i mongulumabo okwa ti vahapu ohava kala ve li pondje tava longifa omalungula okulongifa o-wifi yavo. 

Okwa ti ove na omhangela yokuwedela oAmerican Corner shaashi oi li monhele ya finana. 

moAmerican Corner omu na omambo e li kombinga yomuhoko wOvaamerica, eekompiuta osho yo oikwafifohongo imwe ya wedwa po. 

-wakudumoauleria@gmail.com