Charles Ndeumane
Ongulumambo yoshitopolwa shaShana mEtitano lya zi ko oya oomvula 10 pamwe nesiku lyomathigathano gokulesha goReadathon.
Ongulumambo yomoshitopolwa shaShana oya gwanitha oomvula 10 mEtitano lyoshiwike shaziko okuza shoya patulukile muSepetemba 2014.
Etyapulo ndyoka olya dhimbulukilwa pamwe nesiku lyomathigathano ndyoka lyali li na okuningwa omwedhi gwaziko ashike olya undulilwa komeho moka aanasikola yomoondondo dhopevi okuza koosikola dha yooloka ya thigathanapo mokulesha oshowo moku fatulula iitya.
Oshimaliwa shoomiliyona N$162 oshali sha longithwa moku tunga oongulumambo miitopolwa itatu, Oshana, Ohangwena, oshowo Omaheke nomayambidhidho okuza kepangelo lyaAmerica konima sho omakonakono ga ulike kutya miitopolwa oyali yina onkalo yoluhepo yili pombanda yivule iitopolwa iikwawo.
Omupeviwiliki moshikondo shoonzo dhopantu muuministeli welongo moshitopolwa shaShana Helena Amuthitu okwa ti oya pandula molwa ongulumambo ndjoka oshoka haitopolwa ayihe yina onzo yoludhi ndoka.
“Ino lesha ashike shoka wahla oku uva ashike lesha kehe shoka tashiku longo sha. Okulesha ohaku kaleke omadhiladhilo goye taga longo nawa. Kehe gumwe okuna ompito yokulesha, aanasikola otaya lesha ya pite oosikola dhawo, aalongwantu otaya lesha opo yi ilongekidhile omapulaapulo, aaleli otaya lesha opo ya ninge omatokolo ga longwa, yamwe otaya lesha opo yi inyanyudhe,” osho Amuthitu a popi ngaaka.
Omukuluntu gwuunamambo mongulumambo yomoshitopolwa shaShana Jacob Mureka okwa ti ongulumambo ndjoka oyina oshinakugwanithwa sha simana moshigwana shoku fala uuyelele kaantu oshowo okuyapa ompito yoku ilonga iinima yasimana monkalamwenyo.
“Oongulumambo miitopolwa ya yooloka odhili uuhanona woshikondo shelondo noshikondo shomadheulo oshoka ohadhi eta omauyelele kaantu yavule yi igwedheleko kuunongo wawo yo ya yambulepo ongushu yelongo lyawo,”Mureka ta ti.
Muleka okwa ti nonande ongulumambo ndjoka oya sinama noonkondo moshigwana oya taalela omashongo ga pumbwa oku kandulwapo kaaleli naakuthimbinga ya yooloka opo yi gandje omayakulo koshigwana.
Eshongo limwe enene twa taalele aaniilonga inaaya gwana mongulumambo muka. Aakwashigwana ohayeya oku longitha oonzo ndhoka dhili mongulumambo ashike kapuna aaniilonga ya gwana ya kwathele aantu. Oowili dhiilonga nadho otadhi nyenyetwa oshoka aantu yamwe mboka haya longo ohaya mono owala ethimbo okuza po 17H00 lyo olyo ethimbo ongulumambo hayi pata, oya hala ando yikale hayi pata po 20H00 yo tayi paluka ishewe mOlyomakaya nOsoondaha opo aaniilonga nayo yamone ompito yoku longitha oonzo ndhika. Oshinima oshikwawo shoka hashi longitha aantu nuudhigu ointaneta yetu ndjoka yaana ekwatathano lina oonkondo. Ngele oweyapo ethimbo lyongula lela oto vulu oku longitha omalungula, ashike Shampa aantu yafa ngaa ya ningi oyendji kashona opuwo ngaaka ointaneta itayikwata we, aantu oyendji oya pumbwa ointaneta,” Muleka ta tsikile.