Ongutiro yombongarero ya Algiers ondjiri wina ongutiro yOzombara za Kandjoze ku ku he ri meraka uriri nungwari wina momuhunga nozondando. 

Ehika rOzombara za Kandjoze, ndiri epango rOzombara zOvaherero nOvambanderu mongondjero yomazemburukiro wOtjiṱiro Otjindjandja tjOvaherero nOvambanderu otja tji tja tjitwa kuwo i yohoromende yohuurire yOvandoitji otjOtjiṱiro Otjindjandja otja kOnḓuvasaneno yOmihoko Omikutasane yo 1948 yOndjururiro nOmberero mOndjo yOtjiṱiro Otjindjandja. 

Otja tji mape tjiukwa Ovaherero, Ovambanderu nOvakwena yarire ozombura kaatjondumba nai ave kondja kutja ehi rOvandoitji riyakure kutja ohoromende yaro yoruveze rohuurire ye ve zepa Otjiṱiro Otjindjandja. 

Ndjiri ongondjero ndji ve rikondjera oveni nomasa nozongondjero zawo oveni nandarire wina mokamariva kokutuurunga omahimahi naṋi ve kamune kozombatero momuano kangamwa auhe mbu mave yenene okuzemuna. 

Okutja nai tji mave zuu kutja Oruwano romahi wa Afrika, okutuurungira mOngutiro ya Algiers indji pombongarero ndjari motjihuro ohongora Oalgeirs tjehi ndi Oalgeria tji ya ri 30 ku Tjikukutu ngandu ketenga ra Tjitarazu otjeri ombuze ombwa. 

Amaze rikwamba kongutiro ya Algiers indji. 

Oyo nandar ire kokutja kahunga nOtjiṱiro Otjindjandja, otjo Ovaherero, Ovambanderu nOvakwena tji ve kondja natjo nai, ondando yongutiro ya Algiers okukondja kokutja moveta youye ozongatukiro azehe noviṱukaungura vyohuurire, moveta youye vi rire ongatukiro. Tjimuna tjingetjo Otjiṱiro Otjindjandja kehi yOnḓuvasaneno yo 1948 yOmihoko Omikutasane tjeri ongatukiro nu kehi yayo ngwa munikwa ondjo motjitjitwa tjOtjiṱiro Otjindjandja ama yenene okuverwa. 

“OOCAG mai zemburuka Ongutiro ya Algiers otjohambwarakaṋa onahepero yekoverwahi momatunduuziro wouatjiri, ousemba notjisuta koviwaṋa mbya ṱunwa i yOtjiṱiro Otjindjandja; omapundiro wohuurire; nomauhazendu kovandu,” orutuu kozombuze rwehika rwa Kandjoze maru tja. Naru weza kokutja eraka rongutiro ndji ndwa sana ayo eraka romuravaere mokuti ongaango poruveze orure ondi kara eraka rozondekurona za Namibia zOtjiṱiro Otjindjandja. Tjinene Ovaherero, Ovambanderu nOvakwena mongondjero yokutja oviṱukaungura vyomakuruhungi vi yakurwe okuura nokutja omaṱunino wavyo wakatjotjiri yerire yoporuhaera nowonduri. 

Okuzamba okuyenda komurungu Okandjoze otji maru munu Ongutiro ya Algiers indji otjokati okaṱaṱerwa ku make yandja onḓengu nohakahana kongondjero yOvaherero, Ovambanderu nOvakwena. 

Mu Tengarindi ombura ndji mai yende indji o-2026, ongutiro ya Algiers indji otji mai tuwa otjombepo kotjitiha tjombongarero yoviuru vya Afrika ndji kara ko ombura aihe.