ONGWEDIVA-Onkulungu mokutala onkalo yombepo moshilongo Odilo Kgobetsi, okwa kole ke kutya omvula otayi ka loka monooli iiwike yokomeho.

“Onkalo yombepo otayi ulike kutya komasiku ga taalela okuga mehuulilo shiwike shike iitopolwa yokonooli ngaashi Zambezi Kavango mwa kwatelwa Otjozondjupa otayi ka mona omata geli hwepo,” ta po pi ngaaka.

Okwa ti etengeneko lyonkalo yombepo otali ulike onooli ayihe otayi ka mona omuloka omwaanawa okuza petameko lyaFebuluali.  

Aanafaalama yomomapya oya ti, nonando nuumvo oya li ya longo nuudhiginini omapya gawo, otaya ende taya sholola sho iilya tayi ende tayi kukuta omolwa Shiyenga shaNangombe a pititha po ethimbo okuloka.

Aanafaalama oya ti ethimbo otali ende lya uka komeho ihe omata itaga dhenge pevi.

Tulimuwo Amupolo gwomokunda Omusimboti okwa ti oya kala nokufekela kutya omvula onayi ka loka ngaa komasiku gokomeho, ihe omasiku oga piti owala inaayi loka, ashike kegulu otaku gandja ngaa omukumo.

Ta popi ta ti oya li ya tokola okulonga nuumvo ihe omvula oya huulile ondjilakati.

“Nuumvo otwa li tuna omukumo kutya otuna okulonga omapya getu, opo tu vule oku ka kutha mo natango iilya yokulanditha opo tu vule okwiihupitha moomvula dha landula ko,” Amupolo ta ti ngaaka.

Ta gwedha po ta ti, ngele omvula itayi loko omasiku ngaka, otayika hepeka iimaliwa ya longitha okupululitha omapaya gawo, oshoka iilya paife otayi ende tayi si komutenya.

“Otwa longitha N$5000 okupulula epya alihe. Ondjala nuumvo okwa li tu shi otwe yi thanga omuthi, oshoka okwa li twa tokola okulonga,” ta popi ngaaka.

Maria Johannes gwomokunda Okatana okwa ti natango oku na omukumo kutya omvula otayi vulu okuloka, ihe ombinga yimwe yepya iilya otayi ende tayi si po komutenya.

“Iilonga yaKalunga iinene, ethimbo lyomuloka olyo ndika onkene tuli metegeelelo nantango. Inandi itaala kutya nuumvo oku na ondjala, nonando ondi uvite kiitopolwa yimwe inaaku mona omuloka omwaanawa,” Johannes ta ti ngaaka. Ta ti, omvula ngele oya loko miiwike tayi ya, iilya yimwe otayi hupu.

Johannes ta ti opena natango omagumbo gamwe momukunda gwawo inaaga pulula natango oshoka oga tegeela anuwa omuloka omwaanawa.

Samuel Ashipala gwomukunda Elim okwa ti epya lye inali pululwa nuumvo, oshoka okwa kala a tegelela omuloka omuhwepo opo a vule okupululitha.

“Shika onda kala nde shi tegelela nale, omvula yotango sho ya loko, okwa li ya shololitha ndje. Ka kwa li nda pulula, onda li nda mono kutya otandi hepitha oonkondo dhandje niimaliwa,” ta popi ngaaka.

Ashipala okwa ti okwa tegelela omvula yokehulilo lyaFebuluali, ndjoka oyo hayi loko nawa. vkaapanda@nepc.com.na