Charles Ndeumane 

Aakalimo yomolukanda lwEhenye mOshakati oya manga uukuni kumwe eta ye shi pondola oku shunitha pevi uumbudhi unene weteyo lyomagumbo mboka wa li wa tangalala molukanda moka. Ooyene yomagumbo molukanda moka oya tota po ongundu yoku kaleka po egameno molukanda lwawo ha yi ithanwa Ehenye Neighborhood Watch, ndjoka yeshi pondola okushunitha iimbuluma pevi. 

Omukalimo gwomEhenye Karista Kathena okwa ti Ehenye olyi li popepi nokukanda lwaAnkambya moka mwa kala mushiwike nawa onga ondombe yaafuthi yoku teya omagumbo oyendji. 

Aafuthi mboka anuwa oya kala taya dhedhelitha omagumbo mEhenya, shoka sha eta opo aakalimo ya tote po ngundu yawo yetalelo lyuushiinda netakamitho lyomagumbo. 

“Otu li popepi nolukanda lwaAnkambya moka ha mu zi oombudhi odhindji ashike uumbudhi owa shuna pevi lela mEhenye molwa egameno ndyoka twa tula po. Otuna ongundu yoWhatsApp hoka ha tu kwatathana naashiinda nooyene yomagumbo ha ya kwatathana noku tseyithilathana uuna pwa ndhidhilikwa omainyengo ta ga limbilike mehenye opo aantu ya kale uupathi. Ngele gumwe okwa mono nande egumbo lyamushiinda ta li tewa ota tumu okatumwalaka mbala kongundu yetu yoWhatsApp naashiinda ayehe mboka yeka mono oha ya nuka mo mbala momagumbo opo ya ka kwate oombudhi ndhoka,” Kathena ta ti. 

Omukalimo gwomEhenye omukwawo Titus Shafokutya okwa ti ongundu yegameno lyomagumbo mEhenye oya kwathela lela nonande natango uumbudhi omo ngaa wu li. 

“Uumbudhi natango omo ngaa wu li mEhenye, natango omagumbo otaga tewa ashike itashi fe nale manga ongundu yegameno kaa ya li po. Ando ongundu ndjoka oya li inaa yi totwa po ando uumbudhi owa vuka nayi mEhenye,” osho Shafokutya a popi ngaaka. 

Chief inspector gwopolisi moshitopolwa shaShana Thomas Aiyambo okwa lombwele onzo ndjika pethimbo lyoonkundathana kutya oongundu dhomageno gomagumbo oha dhi kwathele lela moku shunitha pevi omateyo gomagumbo nota kumike aantu momalukanda ga yooloka ga tote po oongundu dholudhi ndoka. 

-mrndeumaneraycharles@gmail.com