Ovalumenhu vavali ova dengwa nokumonifwa oshiponga kovakwashiwana pefimbo kwa li vati tava kendabala okunyeka ko ongodi yomulumenhu umwepo.

Mongaha ovalumenhu ava ova tambulilwa moshipangelo shaNandjokwe nove li monghalo idjuu.

Oshiningwanima eshi osha ningwa oshivike shadja ko mondjila yaNdangwa pomukunda Akunhiihole efimbo lokomatango.

Komufala wopolifi moshitukulwa shaShana Commissioner Naftal Sakaria okwa hokolola ta ti omulumenhu weedula 40 kwa li a ponokelwa kovalumenhu vamwe pefimbo a lefa otaxi okudja kOshakati.

Opolifi oya hokolola tai ti lefa okwa lombwela omushingi wotaxi kutya ota dile mo poundingosho Akuniihole.

“Pefimbo otaxi oya kanghama vati ovalumenhu ovo a li navo motaxi ove mu ndele tave mu pula ongodi yaye yopeke,” Sakaria ta hokolola.

Vati ovalumenhu ovo ove mu twa nombele lwoikando ya yooloka pefimbo loshiningwanima.

Okwa ti nakuninga oshihakanwa pefimbo olo okwa hangika e li motaxi okwa ku pula shi ongodi yaye pondje nokonima okwa ufana ovakwashiwana ovo kwa li ve li popepi neendingosho opo ve mu yambidide.

Okwa hokolola ta ti ongudu yovakwashiwana ova ponokako ndele ovafekelwa nokuva denga noikulumbwati.

Omulumenhu ou a tuwa nombele naye oku li moshipangelo ta mono epango lopaunamiti.

Opolifi oya kumaida oshiwana opo shi twikile okulongela kumwe okukandeka oimbuluma womidingonoko davo.

– fhamalwa@nepc.com.na