Oingulu itano oya vakwa koshinyongo ndele tai dipawa kofikola Braunfels Agriculture School nokulondekwa motuwa. 

Oshiningwanima osha ningwa Etivali efimbo loufiku modoolopa yaKhorixas moshitukulwa shaKunene. 

Omupopiliko wopolifi moshitukulwa shaKunene Warrant Kristofin Hamunyela okwa hokolola ta ti ookalyamupombo ova ya mofikola ndele tava dipaa oingulu nokonima ove i londeka motuwa yavo. 

Opolifi oya ti oingulu oya nuninwa oshihongwa shounamapya omo ovanafikola hava ningi oinyangadalwa ngaashi okulonga moikunino oshoyo okutekula oingulu. 

Fiyo opapa ka pena ouyelele kombinga yovafekelwa ava nomakonakono opolifi otaa twikile. 

Ota ku hokololwa kutya pomuvelo wofikola oha pa longele omukeleli womaliko ashike efiku olo ina uda eshi ookalyamupombo va ya mofikola. 

Opolifi otai indile moshiwana kwau ta ka mona omunhu ta landifa oingulu opo shi lopotele opolifi keshe i li popepi. 

fhamalwa@nepc.com.na