Auleria Wakudumo 

Omupopiliko wouministeli wouhaku nomayakulo oshiwana Walters Kamaya okwa koleka kutya oshipangelo shepangelo shaGrootfontein osha paka omalutu ovanhu ve li 133 onghela. Kamaya okwa ti ouministeli owa kala nokukonga ovapambele voonakufya ovo okudja mo2017 opo va ile ko omalutu avo ashike ova xulila mounyengwi. 

“Ohashi kala shidjuu okukonga ile okumona ovakwapata voonakufya shaashi kave na eembapila doufemba,” Kamaya ta ti. 

Otaku hokololwa omalutu a kala mokila oule weedula tadi likokelele pomuwoi inaa mona ovapambele. 

Vahapu otava pula ngeenge itashi dulika omalutu oo a pewe po oshikondo shovalihongi vounamiti koUniversity of Namibia (Unam), ashike Kamaya okwa ti ouministeli itau dulu okuninga etokolo olo ponhele yovapambele ile yavo vene. 

Okwa ti okuyandja olutu koUnam etokolo hali di komunhu ye mwene ngeenge a xulifa ile eudafano lovakwanedimo. 

“Otashi dulika eshi twa paka ovanhu ava, mongula ovakwanedimo vavo otava pula omunhu wavo. 

Nena natango oha dulu okufudulwa mo ndele ta ka pakululwa,” Kamaya ta holola. 

-wakudumoauleria@gmail.com