Ovalumenhu vatatu ovo va vaka ombwa ova pewa omhito yokulifutila mo modolongo noshimaliwa sheeN$3000 keshe umwe onghela pefimbo va holoka momhangu yamengestalata waSwakopmund.
Oshibofa shavo osha undulilwa komafiku 18 Maarsa neudo nomakonakono opolifi otaa twikile.
Otava pangulilwa oshibofa shoumbudi woinamwenyo yomomaumbo.
Ovatamanekwa ova kwatwa po Etivali konima eshi vati va vaka ombwa noku i landifa po keeN$200 komukainhu ha landifa okapana kolukanda DRC.
Oshiningwanima osha ningwa modoolopa yaSwakopmund efimbo lomutenya mexuliloshivike.
Otaku hokololwa kutya moshikumungu omu omwa kwatelwa okamatyona keedula 12 ashike inaka kwatwa po molwashi eedula dako inadi wana okukala modolongo.
Omupopiliko wopolifi moshitukulwa Erongo, Chief Inspector Ileni Shapumba okwa hokolola ta ti ombwa oya vakwa po pefimbo mwene wayo kwa li e li meumbo.
Ta ti mwene wombwa okwe litwa elambo la fewa koshi yodalate yohofa.
Nokudja opo okwa yongola ombwa yaye nokudidilikwa kutya oya vakwa po.
Otaku hokololwa kutya mwene wombwa pamwe novaneumbo vaye ova ninga onghendabala yokukakonga ombwa yavo.
Ova pewa ouyelele kovakwashiwana kutya ombwa yavo oya monika molukanda DRC.
Ombwa oya hangika nale ya dipawa, ya vavwa.
Omukainhu ou e li mwene wombwa pamwe novashiinda shaye okwa li va fikama onghela komesho yomhangu tava pula ovafekelwa opo vaha pewe omhito yokulifutila mo modolongo.