ONDANGWA – Omalelo goondoolopa moshitopolwa shaShana Etitano oga shayina etso kumwe opo ga kale taga gandja omavi kehangano lyokutunga omagumbo lyoNational Housing Enterprise (NHE), nelalakano lyoku hwepopaleka ondando yomagumbo.
Oproyeka ndyoka oya yi miilonga konima NHE kwali indile omalelo goondoolopa moshilongo gaye kumwe nayo oku kandula po uupyakandhi wo malukalwa moshilongo.
Omunashipundi gwokangundumutima kaNHE, Toska Sem okwa fatulula kutya NHE ota kala ta longele kumwe nomalelo goondoolopa oku pewa omahala goku tunga ga longekindhwa opo ya vule okutungila aakalimo omagumbo kondando yili pevi.
Ta ti, egumbo lyela limwe lyokulala otali kala tali futwa ashike N$400 komwendhi omanga ngoka gena omala gatatu tali kala tali futwa ashike N$1 200.
“Oondolopa dhilwe dhayi melongelo kumwe noproyeka yoNHE ndyoka ongaashi Swakopmund, Eenhana, Nkurenkuru, Rundu, Keetmanshoop, Mariental, oshowo Katima Mulilo,” ta ti ngaka.
Sem natango okwa indile wo oondolopa dhilwe dhi ye melongelo kumwe noproyeka ndyoka okukandula po omaupyakandhi gomalukalwa moshilongo.
Ta ti nonande omalukalwa oga pumba moNamibia, NHE aluhe ota kendhambala okuya po nomagumbo gongushu noge na ondando tayi vulu okwiidhidhimikilwa.
Omalelo goondoloopa gatatu oga holola wo ohokwe yoku longela kumwe noNHE, taga ti kutya ogena omukumo kutya omukalo ngoka otagu ka kutha ko kuupyakandhi womalukalwa moshilongo.
Mayola goondoolopa yOshakati Leonald Hango okwa ti, aantu oyendji oya hala omalukalwa gawo ashike uupyakandhi ondando yoshimaliwa.
“Onda inekela kutya ngele uuyelele mbuka owa thiki moshigwana oyendji ota yeya ya ninge omayindilo,” ta ti
ngaaka.
Omukuluntuwiliki gwelelo lyondoolopa lyOndangwa Ismael Namugongo okwa ti okwa pandula o NHE sho ya tula miilonga oproyeka ndyoka oshoka otayi ka lundulula onkalamwenyo dho yendji.
Mayola gwondoolopa yOngwediva Tarah Shalyefu okwa ti, omuntu kehe okwa pumbwa olukalwa, onkene osha simana ngele oshigwana tashi pewa omahala.
“Oshigwana osha taalela uupyakandhi womalukalwa, ihe oproyeka ndjika otayi kandula po uupyakandhi mboka oshoka otayi ka kwathela oyendji,” ta ti ngaaka.
Shalyefu kwa indile oshigwana opo shi ka ninge omayindilo kehangano lyoNHE opo shi mone omalukalwa.
-vkaapanda@nepc.com.na