Sho omasiku gokukala miilonga kwoongoloneya yamwe ge ya pehulilo oshiwike sha zako, oyendji yomoongoloneya mbaka oya popi kutya otaya taamba ko ashihe Omupresidente Netumbo Nandi-Ndaitwah e ya nine po.

Moonkundathana noshifokundaneki shika ngoloneya gwoshitopolwa shaHangwena Sebastian Ndeitunga okwa ti, ye ota taamba ko ashihe taya ka lombwelwa momasiku 30 gaJuni nuumvo. “Kutya onda lombwelwa ndi tumbe oondongelwa dhandje, nenge nandi tsikile okulonga, ayihe otandi yi taamba ko nomake agehe,” ta popi ngaaka.

Ta ti, ngele okwa tiwa naya tsikile niilonga, ote shi ningi nondjungu, oshoka kape na omuntu ha tandi okulongela oshigwana.Ta gwedha po kutya ngele okwa tiwa iilonga ye oya hulila mpoka natango ote shi taamba ko oshoka okwa longela oshigwana oshindji.“Ngame omunelago oshoka oyendji kakwa li ya mono ompito ngaashi ndjoka nda mono, yokugalulwa moshipundi shevululuko,” ta popi ngaaka. Ndeitunga okwa pandula wo oopresidente ayehe a longo nayo naasho kwa li ye mu pe oompito adhihe mepangelo lyaNamibia.

Ngoloneya gwoshitopolwa shaMusati Erginus Endjala okwa ti ota koleke kutya okwa mono ombapila kutya oya gwedhelwa ko omasiku 10. “Ashike ndhoka tadhi popiwa kutya otandi mono ompito yimwe yokulonga kandi dhi shi. 

Otwa tegelela ashike esiku ndyoka tu uve shoka omupresidente gwetu e tu nine po,” ta popi ngaaka.

Oongoloneya mboka ye li metegelelo lyonkundana ndjoka oyo, Sebastian Ndeitunga (Ohangwena), Elia Irimari (Oshana), Erginus Endjala (Omusati), Neville Andre (Erongo), Pijoo Nganate (Omaheke), Alletha Fredericks (//Kharas) naLawrence Sampofu (Zambezi).

Shika oshikando oshitiyali oongoloneya ya gwedhelwa ko ethimbo miilonga sho kwa li ethimbo lyokukala miilonga lya li lya hulu tango momasiku gaali gaMaalitsa nuumvo.

-vkaapanda@nepc.com.na