EENHANA – Ngoloneya gwoshitopolwa shaHangwena Sabastian Ndeitunga okwa ti, oshiputudhilo shopombanda shoInternational University of Management (IUM) otashika gandja oompito dhuunamapya, shoka sha talika ongesipa lyombunda yoshilongo.
Ndeitunga okwa li ta popi ngaaka esiku kwa patuluwa osikola yo-IUM kEenhana oshiwike sha zi ko.
“Okweeta po iikulya oko onakuyiwa, otaku vulu okweeta po oompito odhindji dhiilonga unene kaanyasha,” ta popi ngaaka.
Ta ti, oshitopolwa shaHangwena oshi na omauwanawa ogendji okukala onzo yuunamapya. Ta tumbula omeya haga zi kohi yevi ngoka taga vulu okulongithwa okweeta po iikunino, onkene oshiputudhilo shoka osho tashi nkulungupaleke aanyasha ya humithe komeho oshitopolwa shaHangwena.
Ndeitunga okwa gwedha ko wo kutya uutekinolohi mboka tau dhana onkandangala methimbo ndika, owo wumwe aanyasha ya pumbwa okwiitula mo muwo, okweendela pamwe noshinanena. Ngoloneya gwoshitopolwa shaMusati Erginus Endjala okwa ti aagundjuka oya pumbwa okukutha ko oongaku e taya tameke nuunamapya nuuniimuna.
“Aagundjuka oyendji oye na eitaalo kutya uunamapya nuuniimuna oshinima shaakulupe, ashike paushili wowene uunamapya nuuniimuna owa pumbwa aanyasha oshoka oye na oonkondo dhokulonga, omadhiladhilo gawo oge li nawa natango, yo ishewe oye na oonzo dhopashinanena ndhoka ya pumbwa opo ye shi endithe nawa muunamapya nuuniimuna,” Endjala ta ti.
Endjala okwa ti, kele kokweetela po aantu pauhandimwe iiyemo, uunamapya nuuniimuna otawu vulu okuyambula po eliko lyoshilongo shi kale shi ithikamena osho wo okweeta ehumokomeho.
“Oshilongo shetu ohashi longitha iimaliwa oyindji noonkondo mokulanda iikulya kiilongo yilwe, ashike natse otu na ashihe shoka twa pumbwa opo tu ilongole iikulya yetu tse yene.
Omuntu iho longo ashike iikulya yomwaalu ngoka wa pumbwa ashike oho longo yi vule po opo wu landithe mbyoka inoo pumbwa wu imonene iiyemo”.
Endjala okwa kumagidha aanyasha ayehe mboka ye li popepi noonzo dhomeya ngaashi moshitopolwa shaMusati moka mu na okanala haka tondoka omeya uule womvula ayihe ya ninge uukunino wawo wiimeno niikwamboga ya yooloka ndele taya imonene iikulya niiyemo peha lyokulila ondjala noluhepo omanga pe na omukalo omupu gwokweeta po sha.