OMPUNDJA – Ondjila ndjoka ya kala omimvo dha pita 30 tayi nyenyetwa kaakalimo yokiikandjohogololo Oshakati shokUuzilo osho wo Ompundja otayi tamekwa okutulwa oteya kehulilo lyomwedhi gwaAguste nuumvo.
Aakalimo oya kala nokunyenyeta iihauto yawo tayi teka po omolwondjila yoholondo ndjoka ya za kOshakati yu uka kOmpundja.
Ondjila ndjoka oyimwe yomooproyekan dhoka tadhi ka tamekwa, konima uuministeli woondjila wa ndhindhilike kutya epangelo ohali longitha oshimaliwa oshindji okutunga nok longulula oopate ndhoka dhopakathimbo, nonkene owa tseyitha kutya ngashingeyi oopate adhihe moshilongo otadhi longwa pamuthika gopashinanena.
Ngoloneya gwoshitopolwa shaShana Hofni Iipinge okwa koleke kutya ondjila yOmpundja otayi ka longwa omasiku tu uka.
“Ondjila ndjoka ya ningi omimvo tayi nyenyetwa otayi tameke okulongwa. Otayi yi sigo ookilometa 25 sigo okomweelo gwaNaluvanda, hoka taku ka tsikila ondjila yopashinanena sigo okOmbuga,” ta fatulula ngaaka.
Minista gwoondjila Veikko Nekundi okwa ti, uuministeli ohawu longitha oshimaliwa oshindji unene okulongulula oondjila dhoholondo, iikando iyali nenge itatu momvula, shoka hashi pula oshimaliwa okuza N$54 000 sigo N$90 000 mokilometa yimwe.
“Oondjila ndhoka tadhi ka longwa pamuthika gopashinanena otadhi ka kwata wo ethimbo lyomimvo dha adha 10-15 inaadhi longululwa, shi vulitha ndhoka dhopaife,” ta fatulula ngaaka.
Nekundi okwa ti natango oondjila ndhoka itadhi ka teka po pethimbo lyomvula ngaashi haku lopotwa shito ethimbo lyomeya.
Omupresidente kwa li gwoshilongo Hifikepunye Pohamba okwa ti itaku vulu okupopiwa ehumokomeho ngele kaku na oondjila dhi li nawa moshilongo.
“Tungeni oondjila oshilongo ashihe, nadhi thike komahala agehe sigo okuushayi opo kehe gumwe a thike komahala gomayakulo. Ngele shoka sha ningwa, nena ngaaka otatu popi ehumokomeho,” ta popi ngaaka.
Pohamba okwa ti Omukokolipresidente Sam Nujoma okwa li e mu thigile oshinakugwanitha shoondjila moshilongo, shoka a li a ningi, ihe okwa hala wo aaleli yopaife ya tsikile ko.
Ta thindi omuthindo ta ti oondjila nadhi thike kehe pamwe.