Auleria Wakudumo
Ouministeli woimaliwa owa holola kutya opendjela otai ka kwatelwa koNampost oshilongo ashishe okudja mu-01 Kotoba 2025.
Opendjela oya kwatela mo opendjela yovakulupe, ovanaulema vonhumba osho yo opendjela younona voukwanaluhepo. Momukanda wa pitifwa komupopiliko mouministeli woimaliwa, Wilson Shikoto okwa holola kutya omulandu mupe otau ka pitika ovanhu aveshe ovo hava kwata opendjela, hava di modoolopa otava ka tala opendjela yavo kombelelwa yaNampost i li popepi navo okudja muKotoba. “Ava hava di kokule nodoolopa, hano hava di eekilometa nhano okudja modoolopa ovo ashike tava ka pitikwa okukwatela opendjela yavo koitayi yaNampost tai ka tulwa po okukwafela ovo hava di koushai,” Shikoto ta ti.
Shikoto okwa holola yo kutya ouministeli owa ninga etokolo eli opo ku xwepopaleke omayakulo opendjela moshiwana osho yo okukwashilipaleka kutya ovanhu aveshe ova mona omayakulo ongushu. Omupopiliko mouministeli woimaliwa okwa indila ovakwashiwana ovo hava kwata opendjela opo va holoke koihongi yoitukulwa tai ka ningwa ya nhuninwa okulonga ovanhu omalunduluko opendjela mape.
Ouministeli woimaliwa otau ka ninga oyoongi moitukulwa aishe yoshilongo tai ka honga ovanhu unene ovo hava kwata opendjela opo va kale ve na owino mwaashi tashi ka lunduluka naashi tashi ka wedwa po shipe. “Eenhele dokukwatela opendjela naikwao ya fimana otai ka shiivifwa kohainga moradio, moifokundaneki, osho yo momahongo omomidingonoko,” Shikoto ta ti.
Shikoto okwa ti ouministeli otau ka kwashilipaleka kutya oshiwana osha mona omboloto yasho yefiku keshe momukalo wa ngungila nou na ouyuuki okupitila momulandu mupe tau ka tameka muKotoba.
Sha landula eshi Omupresidente Netumbo Nandi-Ndaitwah a shivifa eeministeli da yooloka, dimwe oda tulwa mumwe, omanga dimwe oda kufwa oikondo ya imwepo.
Opendjela oya li mewiliko louministeli woukashikekookanhu nonghalonawa yokaana. Ouministeli ou owa kufwa oshitayi shopendjela, sha tulwa kouministeli woimaliwa neudo oo tau ka yandja oshinakuwanifa shopeendjela yoshiwana ashishe kuNampost okudja muKotoba.
-wakudumoauleria@gmail.com