Taimi Haihambo 

OSHAKATI – Opolifi moitukulwa i li itatu yokonooli, Oshana, Ohangwena nOmusati, oya twa kumwe mokutuma ovapolifi koitukulwa opo va tameke opatolola youfiku nomutenya moitukulwa okulwifa oimbuluma. 

Ookomanda vokoitukulwa ivali Omusati noHangwena, opamwe novapolifi okudja koitukulwwa yavo, ova shakena Omaandaxa pombelelwa yakula mOshana opo va tameke noshikonga yavo moshana. 

Pefimbo lokutambula ko ovapolifi noku va pa oinakuwanifa yavo nghee ve na okulonga nonghee ve na okulihumbata, omukulunhu wopolifi moshitukulwa shaShana Naftal Lungameni Sakaria okwa ti kOshana nOhangwena okwa dja ovapolifi ve li 50 omanga mOmusati mwa dja 100. 

“Ovapolifi ava otava ka kala molufo fiyo Olomakaya. mOmandaaxa fiyo Etivali ove li mOshana, Etitatu nEtine ove li mOmusati, Etitano nOlomakaya ove li mOhangwena,” Sakaria ta ti. 

Okwa twikila kutya elalakano lokulonga exwata ngaha unene okupanga oukaume noombushe moilonga vavo osho yo okukala ve na ekwatafano liwa. Okwa twikila kutya oitukulwa ei oi li oushiinda, nongeenge ova kala keshe umwe oku li nondjila yaye itashi ka dja. 

Sakaria okwa ti yo pefimbo vo tava ka longa nokupatolola, otava ka kufa ko oinima ei inai pumbiwa noya ngabekwa okulandifwa nokulongifwa ngaashi omapangwe, omahooli okudja moAngola osho yo oikolwifa hai di moAngola. 

Onghela pefimbo va li tava patolola momatala aShakati ove litwa mo onduba yeebiila dokoAngola hadi ufanwa uuCuca odo inadi pitikwa okulandifwa moNamibia, nove di kufa ko koovene. Pefimbo olo tuu olo natango ove litwa vamwe tava landifa eembelela doikombo dihe na eembapila da wana po doo kadi na oikafa nomitwe doikombo, navo ova kunghililwa va kale ve na omikanda da wana po noda yela. -taimihaihambo2000@gmail.com