ONGWEDIVA – Kakukutu komatanga opolifi Inspector General Joseph Shikongo okwa ti ombelewa yaye otai ka andjaneka ouyelele moshiwana kombinga yoibofa inyanyalifa yovanhu va dipawa kuwalye, mwa kwatelwa ovanhu va kana nosho yo omunyeka wokawe koNAMDIA.
Pefimbo va ninga eenghundafana naKundana onghela, Shikongo okwa yelifa ta ti oibofa ngaashi oshikumungu shokehangano lokawe loNAMDIA osho sha ningwa neudo koWindhoek omo ovalumenhu vatatu va ponokela eembelewa doNAMDIA efimbo lokomatango.
Poshiningwanima eshi opa kanena eemwenyo dovanhu vavali, umwe omunailonga woNAMDIA, Francis Eiseb oo a dipawa kovafekelwa omanga umwe omufekelwa Max Endjala ou vati e liyasha nondjebo ye mwene.
Ovatamanekwa vavali Joel Angula naSam Shololo ove li modolongo nomakonakono opolifi otaa twikile.
Kakukutu kopolifi okwa twikila ta ti oshikumungu shedipao lokaana Avihe Ujaha sha ningwa omudo 2018 nasho otaku ka yandjwa ouyelele kombinga yomakonakono a ningwa kopolifi.
Olutu laUjaha ole lituwa la tetwa moinhimbu moWindhoek.
Okwa weda po ta ti oshibofa shokaana kokamati Oswyn Myne oko ke lituwa momulamba omudo 2022 koKaribib nasho osha kwatelwa moibofa oyo tai ka yandjwa ouyelele.
Shikongo okwa popya ta ti oshibofa shokaana kokamati oko ka kana pefimbo ke na eedula nhatu koLuderitz, Mandela Nakale nasho otaku ka yandjwa ouyelele she likwatelela komakonakono a ningwa kopolifi.
Nakale okwa kana okudja omudo 2020 efimbo lokomatango ashike fiyo onena ina monika.
“Opolifi otai ka yandja natango ouyelele moshiwana kombinga yoshibofa shaMagdalena Stoffels ou a kwatwa onghonga nokudipawa momudo 2010 pefimbo kwa li ta i kofikola moWindhoek,” Shikongo ta ti.
Oshiningwanima osha ningwa pefimbo omunafikola e na omido 17.
Shikongo okwa ti osha fimana opo oshiwana shi pewe ouyelele kombinga yoibofa ya ningwa nelalakano ovanhu va ude osho opolifi ya longa po.
Okwa kumaida oshiwana opo shi twikile okulongela kumwe nopolifi unene tuu okuyandja ouyelele kopolifi ngeenge tai komakonakono oibofa.
“Osha fimana ngeenge oshiwana tashi longele kumwe nopolifi molwaashi otashi kwafele opolifi i longe noupu,” ta ti.
Okwa weda po ta ti oshiwana nashi lopote oibofa pefimbo.