Auleria Wakudumo
Omunafikola e na oulema womesho koshiputudilo shopombada shoNamibia University of Science and Technology (Nust) Amy Andrew, okwa pewa oshimaliwa shoN$200 000 okufutila elihongo laye alishe kehangano loRossing Foundation.
Oshimaliwa osha kwatela mo okufutila odila okuya mokwaaluka koPretoria, South Africa opo a ye komakonakono omesho. Andrew okwa pewa yo olaptop ya longwa momukalo wokukwafela ovanaudu vomesho.
Ekwafo la yandjwa kehangano otali ka lundulula onghalamwenyo yaAndrew.
Andrew okwa dalwa noulema womesho ashike ina efa ounghundi waye u ye elihongo nonghalamwenyo yaye moshipala. Okwa kala ha i kofikola ngaashi ounona vakwao nokwa pita dingi moilongwa yaye inhe modula yotete nonande ha monoko ashike neepelesenda 5.
Andrew okwa holola olupandu kehangano loRossing Foundation eshi le mu kwafa meemhumbwe daye.
“Ekwafo mwa pa nge itali xwepopaleke ashike ounghundi wange womesho ndele otali lundulula onghalamwenyo yange,” Andrew ta ti.
Omukulunhufikola womayakulo ovahongwa, Donovan Zealand okwa ti oshimaliwa sha yandjwa itashi kwafa ashike okufutila ehongo neemhumbwe daAndrew ashike otali mu tu omukumo opo a twikile okulihonga noudiinini.
Omukulunhu koshikondo sheyambulepo lomidingonoko mehangano loRossing Foundation Maria Immanuel okwa holola kutya ehangano ohali kala alushe li udite etumba okukwafela ava ve li momhumbwe.
“Ohatu twikile okukwafela Andrew melihongo laye. Kakele kelihongo laye olo la futwa alishe, Andrew ota ka tambulwa ko yo opo a ninge omalideulo aye kehangano letu opo a mone owino mwaasho te lilongele,” Immanuel ta ti.