Charles Ndeumane
ONGWEDIVA – Aakalimo yomomukunda Olungalunga B moshitopolwa shaShana, mboka yali taya tala omulilo, ngashi ngeyi otaya tala ongalamwithi yaShiteni sho ya pewa omayambidhidho giipalutha yongushu yoN$17 000 kehangano lyOpoto Mills.
Magano Inkono e li gumwe gonaanambelewa aakuluntu mehangano ndyoka okwa lombwele oshikundaneki shika ta ti oya tokola okugandja omayambidhidho ngoka sha landula eithano lyOmupresidente Nangolo Mbumba ngoka a pula aanangeshefa ya yambidhidhe oshigwana mpoka taya vulu omolwonkalo yoshikukuta. Ongeshefa yOpoto Mills ndjoka hayi landitha uusila, oya tokola okuyambidhidha aakulupe oshowo oohandimwe mboka ya dhengwa unene koshikukuta momukunda Olungalunga B. Inkono okwa ti oya yambidhidha omagumbo 15 ngoka ge li mompumbwe yeendelela, oyendji yomuyo aakulupe. Oya pewa ooshako dhuusila womahangu dhookilohalama 25, uushako dhuusila wepungu wookilohalama 10, ooshako dhuuhutu wokudhunga ontaku wookilohala 10, omakende gomagadhi goolitela mbali, oshowo iikumbatha.
Kuku Hileni Asser, gumwe gwomaakulupe mboka ya pewa omayambidhidho okwa lombwele New Era kutya omakwatho ngoka ogeya kwathela noonkondo oshoka oya dhengwa noonkondo koshikukuta.
“Otwapandulaunenekomayambidhidho ngaka oshoka omvula inayi loka nawa naantu oyendji otaya hupu nuudhugu, omayambidhidho ngaka otwe ga simaneka,” osho Asser apopi ngaaka. Inkono okwa ti oya yambidhidha aakulupe mboka ye wete kutya nonande ohaya pewa openzela inashi gwana oshoka oye na aatekulu oyendji, onkene openzela itayi gwanene oompumbwe dhawo.
Okwa gwedha ko ta ti Opoto Mills otayi tsikile nokuyambidhidha oshigwana ngaashi tayi vulu oshoka oshigwana nasho ohashi ya yambidhidha mokulanda iilongomwa yawo. -mrndeumaneraycharles@gmail.com