Hilma Nakanduungile 

OMUNDAUNGILO – Oprimaskola Ndadi moshikandjolongo shaHakafiya moshitopolwa shaHangwena oya pewa oongulu dhoskola dhi li ne nosho wo ombelewa, kepangelo lyaJapan.

Sho a popi pegandjo-pambelewa lyoongulu, omukalelipo-shilongo gwaJapan moNamibia Hisao Nishimaki okwa ti, epangelo lyaJapan olya itaala kutya elongo olyo oshipatululo shonkalamwenyo yi li nawa, onkene olya kala nokuyambidhidha  epangelo lyaNamibia okutunga oongulu dhoskola, okuhwepopaleka onkalo yaanaskola mboka yi iyadha mompumbwe yoongulu dhopamuthika gwoshinanena.

 “Onda nyanyukwa sho okuza nena omwaalu gwaalongwa ye li 140 taya kala taya longelwa moongulu dopamuthika gu li nawa, okuyelekanitha niipeleki moka kwa li haya longelwa. Ohashi yemateke ndje sho aanaskola taya longelwa momahala ngaashi giipeleki, unene tuu pethimbo lyokwenye sho kwa pupyala,” Nishimaki ta ti ngaaka.

Ta gwedha ko kutya oku na einekelo kutya oongulu ndhoka ya gandja otadhi kwathele aalongwa opo ya vule okwiilonga nawa, pwaa na iiyimbi yasha.   “Epangelo lyaJapan olya simaneka elongo noonkondo, onkene otatu tsikile nokuyambidhidha elongo moNamibia, molwashoka otwi itaala kutya elongo olyo tali palelele Aanamibia ondjila,” Nishimani ta ti ngaaka.

Ominista yelongo, uunkulungu nomithigululwakalo Ester Anna Nghipondoka okwa pandula epangelo lyaJapan komagano goongulu, nosho omayambidhidho galwe ngoka ga ningilwa Aanamibia, unene tuu oshikondo shelongo.

“Oshinyangadhalwa shika otashi holola oonkondo dhokulongela kumwe, nokuholola ngeyi kutya uuna tatu longo muukumwe otatu pondola oshindji shoka tashi eta elunduluko ewanawa moonkalamwenyo dhuunona wetu. 

Oongulu ndhika dha gandjwa nena kadhi shi ashike omatungo, ashike otadhi kala wo ehala lyokugandjela uunongo komapipi tage ya,” Nghipondok ta ti ngaaka.

Okwa gwedha ko kutya uuministeli welongo owi ipyakidhila nokutunga oongulu dhoskola dhi li 4000, opo ku kandule po ompumbwe ndjoka yi li po. “Ondu uvite uuntsa okuholola ngeyi kutya omvula ya zi ko, uuministeli owa tunga oongulu dhoskola dhi vulithe 1000, okupitila moNational Conference on Education Implementation Plan. Otwa thaneka wo tu tunge oongulu dhoskola dhi li 250  pamunvo-shimaliwa nguka tu li,” Nghipondoka ta yelitha ngaaka. Ngoloneya gwaHangwena, 

Sebastian Ndeitunga naye wo okwa pandula epangelo lyaJapan komayambidhidho lya gandja koshikondo shelongo noshuunamapya nokwa indile ayehe mboka ya pewa omakwatho opo ye ga kaleke po. Oprimaskola yedhina Ndadi oyi na aalongwa 456, noye na oondodo okuza popre-primary sigo ondondo 7.