Taimi Haihambo 

Oshivike shadja ko vahapu moshilongo ova kala noku popya nehafo molwa eteyo loihakautu moshitukulwa shaShikoto. 

Ashike oshitukulwa osho natango osha longa noudiinini oku weda ko komaludi oikulya, eshi paife moshitukulwa muna neepoloyeka dolwishi. 

Ngoloneya woshitukulwa shaShikoto Sacky Kathindi okwa ti okwa talela po eefalama dafika punhatu tadi ungaunga yolwishi di li moshikandjohoolola shaNayena.

Kathindi okwa ti elalakoano laye loku talelapo eepoloyeka oku tala nghee ovanafaalama tave shiendifa meepoloyeka dolwishi, yee ta tale omashongo aa hava taalele ngeenge ta shiya mounafaalama wavo, opo epangelo li dule oku kufa ombinga mokuvashakeneka ondjilakati oshoyo ku va yambidida.

“Pefimbo le talelepo lange, imwe yomomashongo ndashakeneka omhumbwe yakula yomeva. Oshitukulwa oshakukuta neenghono ngee ta shiya komeva,” Kathindi ta ti.

Ngoloneya okwa yelifa kutya oshi li oshinakuwanifa shaye onga ongoloneya woshitukulwa, oku shiiva nokukala eshi eemhumbwe dovanafaalama moshitukulwa, notaka tula eemhumbwe davo moilonga, oshoyo oku konga omikalo omu epangelo lina oku vatela ovanafaalama ava, loo eteyo lowishi li dule okuya komesho nawa. 

Okwa ti epangelo natango ole li longekida oku kwafela ovanafaalama momukalo woku yandja omadeulo ounafaalama kovakwashiwana vena ehalo lokuninga oikunino. 

Okwa twikila kutya edu eli ovanafaalama ava vati olavo vene, kalishi nande lomunhu. “Ovanafalama vahapu ovaningapo omapya avo oikunino yoliwshi ponhele vakune omahangu,” Ngoloneya ta ti.

Vahapu vati omalwishi ohava a landifa pomatala oshoyo eenhele domalandifilo ayooloka nokavafuko pomafimbo eehango. 

Ngoloneya okwa ti natango okwa teelela eteyo lakula lounakamudesha oshoyo eteyo lomapungu.

-taimihaihambo2000@gmail.com