Auleria Wakudumo
Omukulupe weedula 65 okwa fiwa pomutentya eshi oufita weengobe daye da shingwa po oufiku kuwalye momukunda Oshifukwa moshitukulwa shaShikoto.
Joshua Shitula okwa ti ke shi kutya eengwandabi daye oda shingwa po naana efimbo lilipipo shaashi inadi uhala peumbo efiku olo.
“Onda yongola eengobe dange eshi nda tuma ounona va ka kongololele ashike inave di mona. Konima onda shikula ko ame mwene opo ndi tale ngeenge handi di mono ashike naame onda dja ko ashike nodibo kepepe,” Shitula ta ti.
Shitula okwa holola kutya shaashi ovanhu ihava lifa vali, oimuna ohai kala tai tavakana omakove noyaana ya yooloka.
Okwa ti eshi osha ninga shidjuu shaashi ihava nongele vali otundi oyo oimuna yavo ya kana.
Shitula okwa holola kutya okwa kanifa nale eenghwandabi daye moiningwanima ya yooloka.
Okwa ti oimuna ei a kanifa imwe okwe i mona, a hange ya idililwa kOvanasamaria ovanamutimanghenda naikwao ine i mona fiyo okeluwa eli.
Ohatu fi ounye okuya kopolifi ngaashi ava tu li momukunda shaashi fimbo limwe oimuna ihai monika nande shivifila opolifi.
“Ondi na oumbada ndi kale inandi mona oimuna yange ashike nande ongaho ohandi twikile okupapida pomikunda dopopepi pamwe Kalunga ta kwafa nge ngaho ndi mone eenghwandabi dange,” Shitula ta ti.
Oshiningwanima shimwe, opolifi moUis moshitukulwa shErongo oya patulula oshibofa eshi omufekelwa ehe shivike a vaka eedi d ili 24.
Otaku hokololwa omufekelwa ou a shinga eedi odo koufita momukunda Otavena moUis.
Opolifi oya holola kutya oshiningwanima eshi osha ningwa pefimbo lihe shivike pokati kEtine nEtitano.
Opolifi oya holola yo kutya nakushinga eedi ke shivike ngeenge oku li oye auke ile ova longela kumwe navakwao vamwe.
Omakonakono a wedwa po a ningwa kopolifi okwa holola kutya omufekelwa okwa shinga eedi odo oshinano ndele te di dipaaa nokutulika ombelela noikafa motuwa ndele ta shingi.
Inaku hololwa kutya eedi ngapi da dipawa natango.
Eedi odi na ongushu yoshimaliwa shi fike poN$48 000.