OSHAKATI–Omukalimo gwomomukunda Othingo guli ookilometa tadhi tengenekwa mbali okuza mOshakati okwa ti ekoye lye lyulithilo olya hanagulwa po komulilo gwa zi metoto lyiiyagaya.
Laina Erastus okwa ti, omulilo gwa zi metoto lyOshakati oshiwike shika ogwa hanagula po ondhalate ye noopala oshowo oomwiindhi gwiimuna ye ngoka a kala a ikolelela mu go.
“Omulilo ngoka ogwa dhengendje pevi oshoka ogwa hanagula po ehala lyandje lyuunafalama, shoka tashika pulandje wo oku ka landa omwiindhi gwiimuna omanga kwali ndina gwa gwana,” ta nyenyeta ngaaka.
Ta popi kutya shoka kashi shi oshikando shotango omulilo tagu zi metoto moka tagu fike ekoye lye.
Ta hokolola kutya omimvo dha zi ko natango omililo oku za metoto lyiiyagaya okwali gwa halakanitha ekoye lye, shoka ali anuwa a lopota kelelo lyondoolopa yOshakati, ihe kapena shoka shali sha ningwa po.
Erastus okwa ti ngeno okwali pena mboka taya kondolola omulilo kaa guye kondje yetoto lyiiyagaya ngeno ina gu fika po ekoye lyuulithuli yiimuna ye.
Mayola gwondoolopa yOshakati Leonald Hango pethimbo kwali a dhengelwa koshifokundaneki shika okwa ti ina lopotelwa natango oshiningwanima shili ngaaka.
“Ashike ngele osha holoka, ketoto lyiiyagaya okuna oku kala kuna aanilonga mboka taya kondolola omulilo kaaguye kondje yetoto,’’ ta popi ngaaka.
Ta gwedha ko kutya natago otashi vulika gwa taandalekwa kombepo.
Hango okwa pula kutya oshike ina lopota iiningwanima ya holoka, sho ta ti kutya kashi shi oshikando shotango. “Mombelewa yandje ina mu ya olopota yekoye lyafikwa komulilo tagu zi metoto lyiiyagaya nando o lumwe,” ta popi ngaaka.
Okwa fatulula kutya ngele elelo lyondoolopa olyo lya etitha efiko lyekoye ndyoka, otali shi tula miilonga nkene yena okugandja omakwatho ga pumbiwa. Ashike okwa ti otaka kuutumba naanambelewa mboka yena sha nuundjolowele opo ya kundathane shoka sha holoka po. Omunamukunda gumwe Sam Shilongo okwa ti, okwa nyenyeta kutya etoto lyiiyagaya olya kala uupyakandhi kuyo. “Elelo lyondoolopa olya landa ashike ehala ku gumwe gomaashinda yetu, etaya tula po etoto, ihe inaya yalula uundjolowele wetu,” ta nyenyeta ngaaka.
Shilongo okwa ti, etoto olya tula oonkalamwenyo dhawo moshiponga omolwa olwithi talu tsina kehe ethimbo, oshowo iimuna tayi li oonayilona.
Omanyenyeto gafaathana oga kala taga zi maakalimo ya yooloka konooli. Aakalimo yamwe yomomikunda dha dhingolokwa etoto lyOkahao, moonkundathana noshifokundaneki shika omwedhi gwazi ko nayo oya nyenyeta kutya otaya mono iihuna kolwithi oluluudhe halu zi metoto ndyoka lyaMuni. Aanamukunda oya nyenyeta wo kombinga yoongombe dhawo hadhi si molwaashoka hadhi li oonayilona dhoka hadhi pepwa kombepo nokuhalakana momudhingoloko mpoka hapu napa iimuna yawo. Omusamane gwomukulupe gumwe okwa ti omanyenyeto oga kala nokuhololwa kaanamukunda ihe inapu ningwa sha.
“Uupyakadhi uunene owo mboka kutya iiyagaya ayihe mbyoka hayi zi mondoolopa ohayi umbilwa petoto mpoka, nangele tayi fikwa olwithi oluluudhe ohalu pwipwike nokugwilila po omukunda aguhe, shoka hashi etitha mpoka aanamukunda oyendji ya tameke okukolola omolwolwithi olundji,” ta popi ngaaka.
Ta ti, iimuna yawo oya kala yi li moshiponga oshoka omweelo gwa wo inagu kala hagu edhilwa.
vkaapanda@nepc.com.na