Auleria Wakudumo
Ombadjele – Momukunda Ombadjele mOutapi, Johannes Shuuya weedula 38 ota kufa vahapu omukaa nofaalama yaye yeeshi.
Johannes Shuuya iha landifa ashike eeshi ndele oha yandje yoo kovakwashiwana vomOmbadjele ovo have ya okumukwafa ngeenge ta nete mo eeshi daye ngee da paluka nawa.
Shuuya okwa holola ta ti okwa didilika kutya eeshi dokomulonga, odo haku tiwa yo eeshi dOshiwambo odi holike unene kuvahapu moNamibia.
“Nonande eeshi di holike kuvahapu, ohatu mono ashike eeshi edi pefimbo lodula ngeenge nokuli ku na efundja odula oyo okudja moAngola. Onda didilika kutya ovanafaalama veeshi vahapu ihava munu eeshi defundja,” Shuuya ta ti.
Shuuya okwa ti okwa kwatwa yo kehalo lokumuna eeshi shaashi oku li popepi nokanala komeva oko hake mu kwafa omeva okutula meeshi daye.
Etitano, Shuuya okwa likola eeshi di dule po4 000. Okwa landifa po nale eeshi da konda po2 000.
“Ohandi tulike eeshi dange metuwa ndele handi yi momikunda nomodoolopa ndi ka landife. Ohandi landifa yo komalungula oko vahapu hava kwatafana naame ngeenge va hala eeshi,” Shuuya ta ti.
Shuuya okwa holola yo kutya oku na ondama imwe ashike oku na ehalo lokuwedela ko, a kale e na oundama vavali ile vatatu opo a kale ta likola eeshi oikando ivali ile itatu modula.
Shuuya oku na ovanailonga ve li vanhe.
Oha kutu yo ovakwashiwana unene pefimbo lokukwata eeshi yee te va pe oshivelelwa va twaalele komaumbo.
Okwa ti okumuna eeshi ohaku pula oikulya yeeshi ihapu osho yo oshimaliwa shihapu okufa elambo lomeva leeshi.
“Eeshi ihadi twama poima pehe na oikulya ya wana,” Shuuya ta holola ngaho.
Okwa kumaida Ovanamibia opo va ninge oundama veeshi. Okwa ti ito likola mo ashike oshivelelwa ashike oto dulu oku di landifa opo u mone mo okafilinga kokulikwafa.
Shuuya oha landifa yo oihape noingumutulu ya dja moshikunino shaye momukunda omo tuu omo.
Oshikunino shedina Ndinelao Vegetables ohashi landifa oihape noingumutulu keefitola dakula ngaashi Pick n Pay, Shoprite, FreshCo nokovanangeshefa vanini ovo va hala okukalandifa momapandaanda.
Ndinelago Vegetables osha lukilwa omonakadona Ndinelago.
-wakudumoauleria@gmail.com