Omulumenhu weedula 40 e na oudu wopamadiladilo okwa twalwa koshipangelo konima eshi kwa li ta kendabala okulixwikila monduda nosho yo okutwa ovaneumbo laye neonga. 

Oshiningwanima osha ningwa Omaandaxa komukunda Omanyoshe moshikandjohoololo shaNdola moshitukulwa shaHangwena efimbo longula. 

Omupopiliko wopolifi moshitukulwa shaHangwena Warrant Andreas Nghiyolwa okwa koleka ta ti omulumenhu ou ina monifa omunhu oshiponga. 

Opolifi oya hokolola tai ti omulumenhu ou okwa ya monduda yongulu ndele ta tema omundilo. 

Otaku hokololwa kutya ovaneumbo ova mona omwifi tau di monduda ndele tava endelele okuteya po ekuma longulu. 

Ovashiinda okwa li va holoka momwaalu muhapu okuyambidida ovaneumbo ndele tava kufa mo omulumenhu ou monduda. 

Oku li koshipangelo shaShakati ta mono epango lopaunamiti. 

Ovaneumbo ova vela ombedi opolifi yokEndola tava ti opolifi oya dopa okufika pefimbo eshi ya lopotelwa kombinga yomulumenhu ou a kwatwa koudu yopomadilaadilo. 

“Opolifi oye tu lombwela kutya kape na otuwa. Oya ti itai dulu okufika molwaashi poshitaashi shopolifi yaNdola kape na otuwa,”omuneumbo umwe ta nyenyeta. 

Okwa nyenyeta ta ti ngeno opolifi okwa li ya fika pefimbo ngeno omulumenhu ou ina xwika po onduda. 

“Opolifi oya fika komunute waxuuninwa eshi ya lombwelwa kutya omunhu okwa tomeka onduda omundilo e kwete neonga a hala oku tu twa,”ta ti. 

Neudo pefimbo a ninga omitumba novakwashiwana nosho yo nopolifi monooli, kakukutu kopolifi Inspector General Joseph Shikongo okwa lombwela ovapolifi opo va xulife po okulombwela oshiwana kutya kape na otuwa ngeenge tava lopotelwa oshimbuluma shonhumba. 

Shikongo okwa ti ovapolifi nava kale tava kongo omukalo womeendelelo wokufika koshiwana ngeenge shi na oupyakadi wa pumbwa omayakulo opolifi. 

Omukulunhu wopolifi moshitukulwa shaHangwena Commissioner Ottilie Kashuupulwa okwa ti ovapolifi vokoshitaashi kEndola ovo kwa li tava longo pefimbo va lopotelwa oshikumungu eshi ova dopa oku ka konga ekwafo lotuwa koitaashi imwepo. “Ovapolifi okwa li va wana okushivifila ombelewa yange kutya ope na oupyakadi woludi eli ndele hatu ningi omalongekido otuwa,” ta ti. Okwa ti ombelewa yaye oya tameka okuningila omakonakono ovapolifi ovo kwa li ve li moilonga efiku olo kutya omolwashike va dopa. Kashuupulwa okwa yelifa ta ti oshoshili efiku olo kakwa li pe na otuwa shaashi okwa li ya ya keendingosho donhumba ku na omunhu a pumbwa okutwalwa koshipangelo oo taku fekelwa kutya okwa pewa oudio. 

-fhamalwa@nepc.com.na