Opolisi yaNamibia oya manga aantu ye li 153, ya adhika niingangamithi yomaludhi ga yooloka moshilongo ashihe, momwedhi gwaJuni ashike.
Omupopiliko gwopolisi yaNamibia Kauna Shikwambi okwa ti, iingangamithi ayihe kumwe ya kwatwa ko oyi na ongushu yoshimaliwa shoN$600 000.
Ta ti, iingangamithi mbyoka ya kwatwa ko ongaashi epangwe, lyookilogalama 55 500, oopela dho mandrax dhi li 396 oshowo uukuma woococaine wu li 145.
“Epangwe oli na ongushu yoN$555 400, omandrax oN$47 520 omanga ococaine oyongushu N$14 500. Iingangamithi ayihe mbyoka oya kwatwako moondoolopa dha yooloka,” ta ti ngaaka.
Ta ti, maantu mboka ya mangwa niingangamithi, ayehe kumwe ye li 148 oya kwatela mo Aanamibia, Omuangola gumwe, omuCongo gumwe oshowo Aazambia yatatu.
Shikwambi okwa popi ta ti elongitho lyiingangamithi otali indjipala unene moshilongo, shoka tashi teyagula onakuyiwa yaanona yaanyasha.
“Aanyasha ohaya ningi iihakanwa yiingangamithi nuupu oshoka kaye na oonkondo dha gwana okutinda iingangamithi mbyoka haya hekelwa kwaamboka taye ga landitha,” ta ti ngaaka.
Omolwuupyakandhi wiingangamithi mboka tau indjipala noonkondo, opolisi oya tokola oku ka gandja omalongo omasiku gaali ga landulathana kOtjiwarongo koshitopolwa shaOtjozondjupa.
Martha Shikoyeni omuhungimwenyo gomomikunda okwa ti okwa ndhindhilike kutya iingangamithi oyo uupyakadhi uunene mokati koshigwana.
“Onda ningi omimvo 12 tandi longo nomaupyakadhi ga yooloka, ihe uupyakadhi owundji ohau etwa uuna gumwe a longitha iingangamithi,” ta hokolola ngaaka.
Ta ti, aanona yosikola oya ninga iihakanwa, noyendji oya kanitha eitulemo moosikola.
“Ohandi ithanwa olundji ndi ka popye naanona, ya kanitha omikalo momagumbo, ihe oyendji oye li momakwatathano giingangamithi,” ta ti ngaaka. Shikoyeni okwa ti aanona ye li kohi yomimvo 15 oya yonagula oonkalamwenyo dhawo niikolitha oshowo iingangamithi.
“Shika osha eta omaipumomumwe momagumbo oshowo yamwe ya hulitha po okuya kootundi,” ta ti ngaaka.
Otandi kumagidha aanona, unene aanyasha ya konge omakwatho kaahungimwenyo oshowo koondohotola uuna ye wete ya nyengwa okuhulitha po iiningwanima mbyoka.
Leo Shaduka gomOshakati okwa ti oku shi okuhokolola uupyakadhi wiingangamithi oshowo iikolitha.
“Iinima mbyoka oya teyagula po onkalamwenyo yandje, ngeno hasho ndi li ngeyi,” ta ti ngaaka. Ta ti, okwa li a kanitha iilonga ye omolwiikolitha oshoka kehe esiku oku li ashike kohi yiikolitha. Otandi kumagidha ashike kehe ngoka ta longitha iiteyipo yaantu mbyoka a konge omakwatho gomondjila.
“Osha li sha pula ndje shili ethimbo neyidhidhimiko opo ndi thige po iinima mbyoka ashike nena onda pandula onkalalamwenyo yandje oya ninga ombwaanawa,” ta hokolola ngaaka.
vkaapanda@nepc.com.na