Victoria Kaapanda

ONGWEDIVA-Omukiintu omugundjuka okwa ningi omasiku gatano moshipangelo mOshakati, a zinda omutse, sho a dhengwa nayi komupolisi e li miikutu yiilonga momukunda Onaminda mOshikango.

Paulus Hailonga omumwayina gwo mukiintu ngoka anuwa a dhengwa kaapolisi yomOshikango okwa lekelwa moshipangalo Etitano lya zi ko, moka a ningi esiku e uvite nayi, ye okwa zinda nayi komutse. Hailonga ta ti oku uvite uudhigu sho mumwayinakadhona a dhengwa iipundjamenye.

“Aapolisi mboka oyali ya ponokele megumbo lyaayetu, taya kongo aniwa omaholi sho yali kwatako omaholi inaa ga pitikwa oku landithwa moshilongo megumbo lyopushiinda. Oyali aniwa ya tameke oku teya po oomwelo dhoongulu megumbo konima sho yali ya tindilwa ooshapi oshoka ina ye dhipula pamukalo, yo ishewe kaye na oombapila dhe ya pa epitikilo lyoku hadha,” Hailonga ta ti ngaaka.
Ta hokolola ta ti “omumwamemekadhona ngoka sho a tameke oku kelela aapolisi kaa ya teye po omiyelo, gumwe goomapolisi mboka okwali a tameke oku mudhenga sigo a kambuka, na mboka yali ya tala sho ta dhengwa okwali taya ipula kutya okwa sa”.

Hailonga ta ti nonando opwali aashinda mboka ya hala oku mukwathela sho tadhengwa, okwali ya mbandapalekwa noondjembo kaapolisi kutya ngele oye mukutha po sho tadhengwa otaye ya yaha.
Hailonga tati sho kwali afalwa kopolisi yomoshikango opo a pewe ombapila yokupangwa, okwali aniwa eyi tindilwa sigo a kamona ekwatho kositasi yokOhangwena konima yoowili dhili 15. Okwa falwa koshipangelo shaEngela hoka ye ke mu tumina koshipangelo oshinene shaShakati.

“Omumwameme okwa dhengwa nayi, ondu uvite nayi. Ngeno okwali ya pula nawa itaya longitha oonkondo ngeno ooshapi oyedhi pewa ashike kaa pe na uwinayi, Ashike shino onkalondjigilile yaapolisi yomOshikango,” Hailonga a hokolola.

Ta ti apolisi yomOshikango oye hole oku dhenga aakwashigwana, kape na etompelo. Ihe ngele owa hala oku ya tulila mo oshipotha mboka yeli mositasi kaye hole oku shi pitika, ta ti yo nayo ina ya tula mo oshipotha sigo onena ashike oye na oku shi tula mo ashike.

Omugandjimulombo nomugandji gwomawuyelele moshitopolwa shaHangwena Abner Kuume Itumba okwa ti ehokololo ndjoka Hailonga a hokololo kali na uyelele gwiihwa po.

Ta ti aapolsi mboka oyali ye li miilonga, nomukiintu ngoka okwali a dhengelwa puundingosho molukanda Seven de Laan mOshikongo ihe ha megumbo lyaandjawo.

“Okwali twa lopotelwa kutya omukiintu ngoka okwali a ponokele omupolisi gumwe tango konima sho kwali taya patitha oondingosho oshoka ethimbo lyokupata olya li lya thika. Otaku hokololwa kutya omupolisi nomukiintu ngoka oya kala nale ye na omawupyakadhi pokati kawo”, Itumba ati ngaaka.

Hailonga okwa koleke kutya mumwayina oya kala yiishi nomupolisi oshoka omupolisi oye tuu ngoka oku na okanona nomukiintu gwopuushiinda ngoka ihaaya tsu ya thithe na nakudhengwa. Ta ti otashi vulika omupolisi ngoka e ya oku dhenga omukiintu ta longitha oonkondo dhoka a pewa kuupolisi omolwa okwaa ha tsa kumwe kuli pokati komukiintu gwe noshihakanwa she. 

Ta hokolola ta ti iipotha iyali oyali ya patululwa, shimwe oshali sha patululwa komupolisi sho ilonga ye ya yiwa moshipola oshowo oku dhengwa. Omaga shimwe oshali sha patululwa kaakonakoni.
Itumba okwati omukiintu ngoka ali a dhengwa ina tula mo oshipotha sigo onena. Ashike omakonakono ogeli metifa nango kutya oshike sha etitha edhengo.