Omuhongifikola umwe mOngwediva okwa hanga eumbo laye la tutwa po filufilu kookalyamupombo manga e li koilonga. 

Oinima oyo ya vakwa mo oya kwatela mo ombete nomalapi ayo, okila yokutalaleka, efiya nomaliko amwe a wedwa po. Oinima aishe kumwe oi na ongushu yoN$12 000. 

Omupopiliko wopolifi moshitukulwa shaShana Inspekta Thomas Aiyambo okwa ti omuhongifikola oo oha nangala kosekundofikola Iipumbu kOshakati oko ha longele. Vati efiku olo okwa hangika kofikola eshi eembudi de liteela meumbo laye. 

Oshiningwanima osha ningwa pokati kOsoondaxa nEtivali efimbo loufiku mOngwediva. 

Otaku hokololwa kutya meumbo inamu hangika omunhu pefimbo loshiningwanima. Opolifi oya hokolola tai ti umwe womovashiinda okwa dengela mwene weumbo kutya omakende eumbo laye okwa patuluka. Oshiningwanima shikwao, ongeshefa yoRutunga Heavy Investment Workshop oye liteyelwa kookalyamupombo nokuvaka mo oinima i li pongushu yoshimaliwa sheeN$30 067. 

Oshiningwanima osha ningwa Omaandaxa pendiki lomangeshefelo David Shikomba mOngwediva efimbo loufiku. 

Otaku hokololwa kutya ovanailonga eshi va ka patulula ofitola efimbo longula ova hanga omivelo da teywa. Oshiningwanima shikwao, eumbo lomunailonga wo-NBC okwa ponokelwa kookalyamupombo pefimbo kwa li te likosho nokuvakwa efano loilonga li li pongushu yoshimaliwa sheeN$80 000. 

Oshiningwanima osha ningwa Omaandaxa molukanda Evululuko mOshakati. Lwopokati opo, okakadona keedula 19 oka ponokelwa meumbo pefimbo kwa li ka kofa nokukwatwa onghonga ndele taka nyekwa omaliko ako. 

Oshiningwanima osha ningwa modoolopa yaNgwediva Omaandaxa efimbo lomokati koufiku lwopotundi 01h00. 

Opolifi oya hokolola tai ti omulumenhu weedula 20 okwa teya eumbo nokuya mo ndele ta longele okakadona aka omunyonena wopaixulo. Otaku hokololwa kutya omufekelwa okwa manga nakuninga oshihakanwa neengodi keenyala nokomaulu ndele te mu tula olaima komesho. 

Omufekelwa okwa li a nyeka okakadona aka ongodi yako ashike oya monika. 

fhamalwa@nepc.com.na