Omulumentu gumwe koKatima Mulilo okwa teka okwaako sho a ponokelwa konkoshi Omandaaha.

Sha ikolelela kuuyelele wa gandjwa komupopiliko muuministeli womidhingoloko, iihwa nomapashiyono Romeyo Muyunda, oshiningwanima shika osha holoka ethimbo lyoshitumbetango.

Okwa hokolola kutya onkoshi ndjoka ya monitha omulumentu ngoka oshiponga oya li pamwe nonkwawo notaku tengenekwa dha iyaka mehala lya gamenwa lyaChobe omolwenota nondjala.

Onkoshi ndjoka ya monitha omuntu oshiponga  oya yahwa nokudhipagwa pamulandu guuministeli kutya, ngele oshiyamakuti osha dhipaga nenge sha monitha omuntu oshiponga, nasho nashi dhipagwe,

Otaku hokololwa kutya oonkoshi ndhoka okwa li dha monika kaakwashigwana tadhi ende omanga inaadhi ponokela omulumentu ngoka.

Omwedhi gwa yi, omulumentu gwomimvo 43 okwa si sho a ponokelwa kondjamba moshitopolwa shaMusati.

Otaku hokololwa kutya oondjamba odha hilwa komatanga ngoka ga li mepya.

Muyunda onkene ta tsikile okukumagidha oshigwana shi li popepi nomatonatelwahala niikunino yiinamwenyo ya kale aluhe ya nkondopaleka omalukalwa gawo oshowo ya kale ye li uupathi  ethimbo alihe opo kaaya ponokelwe kiiyamakuti.

“Oshigwana nashi kale tashi tseyithile opolisi oshowo aanambelewa yetu meendelelo uuna ya mono omayinyengo giiyamakuti, opo ku kuthwe omatokolo mbala, nokugamena oomwenyo dhaantu,” ta popi ngaaka.

Okwa yelitha kutya omuntu ngele a monithwa oshiponga kiiyamakuti iha futwa, ihe oha pewa ashike okashona kokwiiyambidhidha.

-vkaapanda@nepc.com.na