OSHAKATI - Aantu yamwe oshiwike sha zi ko anuwa oya li ya tumwa ya ka lande omiti kooaputeka dhopaumwene, molwaashoka oshipangelo shepangelo shaOutapi kashi na omiti.

Shika anuwa ohashi eta opo aanuumvu yamwe ya shune komagumbo yaa na omiti oshoka kaye na oshimaliwa shokulanda omiti kooaputieka dhopaumwene oshoka hoka omiti odhi na ondilo.

Omunuumvu Wellem Johannes gwokomukunda Omahenene moshitopolwa shaMusati okwa ti okwa li gumwe gomaamvu mboka ya tumwa ya ka lande omiti dhawo yene.

“Ondi na omukithi gosuuka. Olundji nda talele po oshipangelo shOutapi onda kala noku shunithwa ko oshoka anuwa omiti odha pwa mo moshipangelo, shika otashi lulumike oshoka omiti dhomikithi dhetu odhi na ondilo, itatu dhi vulu,” ta nyenyeta ngaaka.

Ta pula kutya oshike omiti ndhoka dhi li mooaputieka dhopaumwene omanga miipangelo yepangelo kadhi mo.

Johannes okwa ti, oyendji ohaya longitha oshimaliwa oshindji okuthika kiipangelo, ihe otaya galuka ishewe inaaya mona omiti oshoka kape na oshimaliwa shokulanda omiti.

Sho kwa li kwa pulwa omukuluntu muuministeli wuuhaku nonkalonawa Ben Nangombe a tye ko sha, okwa ti uuministeli owu na omiti dha gwana.

Ta ti, oshipangelo shOutapi osho ashike inaashi ninga omayindilo kuyele opo omiti dhi kale dha thika pethimbo.

“Otandi indile iipangelo yi kale hayi tula mo omayindilo gomiti kuyele okuyanda uupyakadhi woludhi nduka,” ta kumagidha ngaaka.

Omukuluntu guuhaku moshitopolwa shaMusati Alfons Amoomo okwa ti, oya koneke aalongi yomooaputieka haya lombwele aamvu ya ka lande omiti kooaputieka dhopaumwene.

“Shoka ohaye shi ningi yaa na ekwatathano nandohotola ngoka a shangele omuumvu oopela ndhoka. Ihe ndohotola oha vulu okushangela oomumvu oopela dhilwe ndhoka tandhi opalele,” ta fatulula ngaaka.

Amoomo okwa ti, oshili ope na omiti dhimwe kwa li dha pwa mo, ihe dhimwe odha thika oshiwike sha zi ko mEtine.

Ta gwedha po ta ti ndhoka natango inaandhi thika otadhi thiki omasiku ngaka.

Maria Shikulo ngoka e na omukithi gwosuuka nombinzi ya londa naye okwa ti, okwa li a lombwelwa a ka lande oowenda dhe oshowo oopela dhomikithi dhe oshoka kadha li mo moshipangelo esiku ndyoka.

“Onda shuna kegumbo kaandi na omiti, oshoka kandi na oshimaliwa. Oondohotola odha kala nokufatulula kutya omikithi dhi na ndje odha nika oshiponga, onkene odha pumbwa omiti kehe ethimbo,’’ ta popi ngaaka.

Ta ti, omwedhi aguhe nguka ita kala ta nu omiti oshoka odha pwa po, ngele otashi mu etele , ke na nkene e shi ninge.

Shikulo okwa ti okwa li a kondjitha omupangi pamwe te mu monenemo nando haadhihe, ihe anuwa okwa li a lombwelwa kutya kamu na sha  omiti moshipangelo, naalande ashike kooaputieka.

“Otashi uvitha nayi, nonando out uvite oomilliona odhindji tadhi longithwa mepangelo moka , ihe iipangelo kayi na omiti, ano iimaliwa ohayi yi peni?” ta nyenyeta ngaaka.

Gumwe a li a talele po oshipangelo oshiwike shika okwa li a lombwelwa anuwa kutya moshipangelo kamu na oondohotola, na ye a ka pangwe kOshakati.

“Otwa li twa lombwela kutya oondohotola odha shuna kiilongo yawo, oshoka ookontalaka dhawo odha pwa ko. Otu na aanona ye li moshilongo yaa na iilonga ihe oya mana omailongo gawo, ihe oyendji otaya lombwela ashike kombinga yekonakono lyomoNamibia,” ta nyenyeta ngaaka.

Ta ti, epangelo nali ninge po omalundululuko mpoka, aanona yawo oye li momapandaanda omolwoompango tadhi ya keelele okulonga ongoondohotola omanga aanumvu taya shuna komagumbo inaaya yakulwa.

Selma Shoolongo ngoka a li a popi nomutoolinkundana nguka pangodhi okwa ti oku na ombinzi ya londa ihe ngele ita nu omuti nena nomukuthi ngoka itagu ti po hwepo.vkaapanda@nepc.com.na