Nonando nuumvo aanafalama yomapya oya li ya longo nuudhiginini, oyendji oyeli taya sholola, taya ti oya hepitha oonkondo dhawo, niilya otayi ende tayi.

Aanamapya otaya ti kutya ethimbo ota li ende lya uka komeho ihe omata itaga dhenge po pevi.

 Taya ti, oya kala ye na omukumo kutya omvula nayi ka loka ngaa komasiku gwo komeho, ihe omasiku oga piti owala inaayi loka.

Maria Kaluwapa gwomomukunda Omuthitu gwonyama okwa ti, omvula okwali ya loko nawa okuza petameko yomumvo nguka, ihe nena ya mwena ko.

“Aanongononi yonkalo yombepo oya li ya tengeneke kutya omvula otayi ya ihe twali ku tegelela, nena iilya yetu ombika tayi si po,” ta nyenyeta ngaaka.

Nelago Iiyambo yomomukunda Onamhinda okwa popi ta ti, oya li ya tokola okulonga nuumvo ihe omvula oya huulile ondjila kati.

“Nuumvo okwa li tuna omukumo kutya otuna okulonga omapya getu, opo tu vule okuka kutha mo natango iilya yokulanditha opo tu vule okwiihupitha moomvula dha landula ko,” Kaluwapa ta ti ngaaka. 

Ta gwedha po ta ti, oya hepeka iimaliwa ya wo yoku pulula, oshoka iilya paife otayi ende tayi si ko mutenya.

“Otwa longitha N$3 600 okupulula epya alihe. Ondjala nuumvo okwa li tushi otweyi thanga omuthi, oshoka okwa li twa tokola okulonga,” ta popi ngaaka.

Tresia Neshuku gwomOshiku shaShipya okwa ti, natango okuna omukumo kutya omvula otayi vulu okuloka.

Ta ti ombinga yimwe yepya lye iilya oya sa po ko mutenya.

“Iilonga yaKalunga iinene, ethimbo lyomuloka ina li kuka natango. Inandi itaala kutya nuumvo okuna ondjala, aanelago oyena iilya ya talelelwa nawa natango” Nehuku ta ti ngaaka.

Ta ti, omvula ngele oya loko miiwike ta yiya, otashi vulika iilya yimwe yi hupe.

 Neshuku ta ti, ope na omagumbo gamwe momukunda gwawo gena iilya ya sa po thilulu komutenya.

– vkaapanda@nepc.com.na