ONGWEDIVA-Omolwa ombuto yoCovid-19 ndjoka ya ndhigupaleke onkalo yongeshefa, aanangeshefa oyendji otaya nana nondatu, unene mboka aashona taya hiila pomahala kaage shi gawo.

Oyendji otaya ti oya panga momagumbo okuza muApiilili, kaaye na iiyemo yasha, ashike ooyene yomatungo mpoka taya ngeshefele, mwa kwatelwa omagumbo moka haya zi, onkene taya pula opo ya fute oshimaliwa sha gwana po nando oshi shiwike nawa kutya oongeshefa dhawo odha kala dha pata.

Omunangeshefa, ha landitha iikutu Kaino Hamunyela a tseyika nawa nedhina Kaino Fashion Design, okwa ti, onkalo oyeya dhigupalela nayi. Ongeshefa itayi ende we ngaashi shito.
Otaya thiminikwa okufuta oohila, nomwedhi ngoka yali inaa ya longa gwaApiilili. Ta pula kutya oshimaliwa otashi zi peni?
“Omwedhi gwaApiilili ina tulonga, otwa li twa lombwelwa tu pate oongeshefa  dhetu. Ihe medhina lyokontoraka ndjoka twa shaina  nooyene yomatungo kutya otu na okufuta  okuza omwedhi tweya mo sigo omwedhi gwahugunina twa ganena okuza mo, katuna nkene tu na oku ninga,” Kaino ta ti ngaaka.

Ta nyenyeta kutya, oshike ooyene yomahala ngoka itaa ya uvu ko kutya oshimaliwa ohashi ya po ashike ngele taya longo? “Nena otafutwa tashi zi peni, ngele omwedhi ngoka gwaApiilili inagu longwa?” Hamunyela ta pula. 
Hamunyela ta ti, nonando oshilongo sho sha patuluka natango ongeshefa itayi ende nawa, kehe gumwe ota nyenyeta ashike. Ta ti kaye na mpoka taya landa, oositoka odha pwa mo moositola noongamba odhapata,  shoka tashi ulike kutya kape na ongeshefa we oshimaliwa kashi po.
Omunageshefa gwooonguwo dhopashinanena ta popi neyeme kutya otaya mono ihuna, iyemo mbyoka kwali haya longo ihaye yi mono we. Oye na omeya nomalusheno oshowo inima oyindji hayi futwa komwedhi, ihe oshimaliwa itashi gwana we. Ta ti omasiku tage ke ya oya tega okuthigwa pomutenya iinima ya ilwa ko kooyene oshoka inaya futa.

Ta pula ta ti, ooyene yoohila naya kuthe ko koondando, ikwamalusheno oshowo omeya nago naga shunithe omayalulo gawo pevi, oshimaliwa kashi po we, unene kuyo mba haye shikongo momapandanda.
Omunangeshefa omukwao Justine Sackaria, ota indile epangelo lyi ya tale, mboka haya hupile moondingosho, ta ti otaya si ondjala. Sackaria ta pula kutya, ano oshike itaya yalulwa ngaashi aaneshefa aakwawo ya tameka okushingitha.

“Ngame ohandi hupile ashike mongeshefa yokulanditha iikunwa yandje, ondi na okupa aanona yandje okulya oshowo okwikwathela ngaye mwene nokufuta iinima yandje oyindji, ihe kandina oshimaliwa,”Sakaria a popi ngaaka.
Tanyenyeta ta ti, aantu naya lande okunwa kwawo e taya kanwina komagumbo gawo, nenge ya tulilwe po ethimbo oondingosho tadhi patuluka nokupata opo wo nayo ya monemo oshimaliwa sho ku ikwatha ethimbo ndika.