Ehangano lyokukoleka iiputudhilo yopombanda lyoNamibia Qualifications Authority (NQA), olya kumagidha aalongwa yi inyolithe noosikola ndhoka dha kolekwa.
Ethimbo ndika lyetameko lyomumvo, aanasikola oyendji otaya kongo oosikola kiiputudhilo yopombanda, ihe otaya kumagindhwa kaaya ninge iihakanwa yoosikola inaadhi gwangithwa dho inadhi kolekwa, nenge inaadhi taambwa ko pambelewa.
“Omandhindhiliko goonzapo oga simana oshoka ogo haga kwashilipaleke kutya oonzapo oyi na ongushu, noya kolekwa ko-NQA. Ongushu ndjoka oyo hayi petha omulongwantu iilonga,’’ omukuluntupitithi gwomauyelele mehangano lyo-NQA Lina Ndengu ta fatulula ngaaka.
Ta gwedha po kutya okundhindhilika ohaku ulike uukwashili wiilonga osikola yi na nuuministeli welongo, shoka tashi gandja omukumo kaalongwa ya vule okwiilonga nosikola yontumba.
Ta ti, NQA oye ashike moNamibia a pewa epitikilo nuuthemba okundhindhilika iiputudhilo yopombanda oshowo oosikola dhilwe hadhi gandja omalongo.
“Okwiilonga koosikola inaadhi ndhindhilikwa, okumanapo kwethimbo niimaliwa oshoka onzapo kayi na ngushu, yo kayi na siku yi longithwe,’’ ta fatulula ngaaka.
Natango okwa kumagidha wo mboka ya hala okwiigwedhela ko kiiputudhilo yokondje yoshilongo, ya kwalishilipaleke tango kutya oosikola ndhoka odha ndhindhilikwa.
Okwaa na iilonga okumwe komiizemo, yoonzapo dha zi koosikola inaadhi ndhindhilikwa nenge dhiifundja.
Opolisi yaNamibia ongula yEtine nayo okwa li ya kumagidha oshigwana shi kale sha kotokela aafuthi, ethimbo ndika aalongwa taya kongo oosikola, yaa yugwe iimaliwa yawo.
“Ope na mboka taya kongo oondunda dhokuza oshoka okwa mono osikola yi li mondoolopa moka kee shi, ihe kambadhaleni mwaa itale kehe ngoka te mu pukulula,’’ ya kumagidha ngaaka.
Opolisi oya ti, oshigwana inashi pulakena kehe shoka tashi lombwelwa kaantu kaye ya shi, oshoka mboka aafuthi.
Oya gwedha po kutya oosikola dhimwe inadhi ndhindhilikwa ihe otadhi uvitha ko aalongwa opo ya ishangithe kiiputudhila yawo yiifundja.
“Oosikola adhihe dha ndhindhilikwa oko dhi li komalungula, kongeni uuyelele awuhe omanga inamu ninga iihakanwa,’’ opolisi ya kumagidha ngaaka.
Okwa ndhindhilikwa aanona aanyasha ya kalekwa momagumbo koonzapo dhawo oshoka inadhi ndhilikwa, oshidhigu okumona iilonga.
vkaapanda@nepc.com.na