OSHAKATI - Aanona yaali yosikola oya mangwa po sho ya adhika taya hili omapangwe pethimbo lyootundi molugumbo lwosikola.
Shika osha ningwa oku uka pehulilo lyoshiwike sha zi ko momukunda Onangwe moshitopolwa shaHangwena.
Omukuluntu gwelongo moshitopolwa shaHangwena Isak Hamatwi okwa ti, okwa lopotelwa oshinima shi li ngaaka, ihe ke na uuyelele wi ihwa po opo a tye ko sha pethimbo ndyoka.
Otaku hokololwa kutya aalongwa mboka yaali ohaya hiti posikola Tweufiilwa Samuel Nepunda Combined School, ye li mondondo ontihetatu.
Aalongwa mbaka anuwa okwa li ya hili iingangamithi mbyoka pethimbo lyootundi.
Sha ikolela komushangwa ngoka gwa pitithwa kosikola, konima kwa li kwa ningwa omakonakono, okwa li kwa itsuwa ishewe omapangwe, ye ga kuna megumbo, kaandja gumwe gwomaalongwa mboka.
Natango opolisi sho ya li ya tsikile nomakonakono sigo okomagumbo okwa li ya adha ko iingangamithi.
Okapakete komapangwe anuwa oka li ka adhika kohi yomatama megumbo lyaandjagumwe, oshowo epangwe lya kunwa mo.
Opolisi yaNamibia oya kala nokukumagidha oshigwana, unene mboka taya landitha kutya iingangamithi otayi yono po onakuyiwa yaanona.
Omupopiliko gwopolisi moshilongo Kauna Shikwambi omvumvo gwa yi okwa li a popi ta ti oya lopotelwa omwaalu gwaanona yosikola taya longitha iingangamithi moosikola tagu indjipala.
“Aanona yosikola otaya longithwa nokuhekwa kaalandithi yiingangamithi. Yamwe otaya pewa ya ka landithe koosikola.
Oshinima shoka otashi teya po oonkalamwenyo dhaanona,” ta nyenyeta ngaaka.
Ta ti, opolisi oya kala nokwiindila oshigwana shi lopote aantu mboka taya landitha iingangamithi kopolisi, opo ya kuthwe mo mokati kaantu.
“Otashi uvitha nayi, aanasikola taya longitha iingangamithi, pehala lyokukala ya itula momambo gawo, oshoka oyo oshigwana shokomongula, aantu mboka otaya teya po oshilongo shetu,” ta po pi ngaaka.
Ta ti, iingangamithi oyi li uupyakadhi mokati kaanona yosikola oshilongo ashihe.
Aalandithi yiingangamithi otaya longitha omikalo odhindji nodha yooloka okulongitha aanona yosikola.
“Uuna aanona yosikola ya adhika niingangamathi, ohaya patulilwa oshipotha, ihe ohashi konakonwa, sha ikolela komimvo dhokanona. Haaluhe haya tulwa konima yekumba,” ta fatulula ngaaka.
Ta ti, opolisi ohayi kala mekwatathano naahungimwenyo, opo ya kambadhale okuhunga aanona mboka omwenyo, nkene ye na okuhulitha po okulongitha iingangamithi oshowo oku ya fatululila oshiponga shiingangamithi.
Opolisi otayi kumagidha aakuluntu ya kale taya lopota uuna ya mono aanona yawo taya longitha iingangamithi, opo yi vule okukwathela.
Oya gwedha po wo kutya aantu oyendji mboka haya hili iingangamithi kaye li melandulathano.
Anuwa yamwe ohaya piyaganekwa pamadhilandhilo, shoka hashi ya fala ponkatu yoku ka longa iilonga inaayi uka, ngaashi omakwatonkonga oshowo omadhipagathano.
vkaapanda@nepc.com.na