“Ohatu mono oixuna koluhepo, meumbo katu na eshi a tulile mo, ohatu nu ashike omeva shaashi kape na sha oikulya. Ounona vetu ohava nangalele ondjala, vo tava piti ongula tava i kofikola vehe na omudjalofikola neenghatu. Katu na sha oyuuyemo yasha, fyee katu na sha noufemba woshilongo. Osho shi li ohatu dengwa kondjala noluhepo.”
Aa omatumbulo aJohanna Jonas pamwe nounona vaye meumbo, noundenge vaye tava hokolola nghee tava dengwa kondjala noluhepo.
Pefimbo Kundana a talele po eumbo lavo Etitatu momukunda Omafufu moshikandjohoololo shaNyaanya, moshitukulwa Oshikoto ova hokolola tava ti ova kala tava mono oixuna kondajala oule weedula hetatu.
Okwa popya ta ti meumbo lavo ove li mo ve li 20, omo mwa kwatelwa ounona 9 hava i kofikola, ovakainhu vovanyasha vavali tava nyamifa, ounona vatano ve li koshi yeedula nhano ihava i kofikola, omukainhu umwe e li meteelelo, nomukulunhu oo e li oye mwene weumbo paife.
Ounona aveshe ina va hangika mo efiku olo Kundana a talela po eumbo lavo, ounona vamwe ova hangika va ya kofikola, omanga vamwe okwa li va ya koundingosho, vamwe vati okwa li va ka danauka poushiinda.
Jonas ou e li oye omukulunhu kuvakwao okwa lombwela Kundana ta ti konima eshi ina yavo a fya momudo 2013, okwa kufa ko oshinakuwanifa opo a kale ta tonatele ounona meumbo, ashike okwa talela eshongo linene shaashi ke na sha oilonga yasha.
“Ohatu landifa ashike ombike koundingosho ile keependjela opo tu mone mo okamaliwa kokulanda oufila. Efimbo limwe ombike ohai dulu okukala inai yandjwa shaashi ovanhu kave na oshimaliwa, onghee ngeenge ombike inai landwa efiku olo, nena nafye ihatu mono oshimaliwa shokulanda oufila,” Jonas ta hokolola.
Jonas okwa ti ounona vamwe ihava i vali kofikola shaashi otava dengwa konghai yoidjalomwa neenghaku.
“Ondi na ounona ve li vahamhano ashike aveshe kave na sha eedjapo domadalo, omanga vamwe ooxe yavo ova fya nale, vamwe kandi shi kutya ooxee ove li peni. Ounona vange ihava mono oshimaliwa eshi hashi pewa ounona veefiyee okudilila kepangelo shaashi keve na sha oufemba,” Jonas ta ti.
Okwa popya ta ti naye ke na sha oufemba woshilongo, vati ke na sha oshimaliwa shokuya keembelewa doikwameni opo a ka konge oufemba waye, nounona vaye.
“Otwa pumbwa oikulya, oikumbafa, oidjalomwa, eenghaku neenduda dokunangala shaashi paife ohatu nangala ashike meenduda doifini muhe na eembete,” Jonas ta ti.
Okwa ti ota indile moshiwana opo shi va yambidide nakeshe eshi tava dulu okuyambidida nasho.
Saima Maria oku na omido 20, e na ounona vatatu okwa popya ta ti iha dulu vali okunyamifa shaashi ke na sha omashini molwaashi iha nu oshikundu, vali po kape na sha oikulya ei tai mu etele omashini monhulo.
“Onda xulila mondodo onhi-8 konima eshi nda ninga eteelelo, onda kala ndi na oluhepo loshimaliwa shokofikola onghee onda ninga onghendambala opo ndi likongele po ohonda yange opo i kale tai yambidida nge,” David ta ti.
Okwa ti okwa ninga epuko lakula eshi a fiya po ofikola shaashi paife ooxe younona vaye aveshe ihave mu yambidida vali, omanga vamwe ova faduka po nale.
David okwa ti yee oku na oufemba woshilongo, ashike ounona vaye ovo ashike vehe na oufemba shaashi naye vati ke na sha oshimaliwa shokuya keembelewa doikwameni opo a ka kongele ounona oufemba.
“Okwa ti oku na ounongo wokupanda ovanhu, ashike okwa nyengwa koshimaliwa opo a dule a konge onhele yaye omo ta kala ta pandele ovanhu,” David ta ti.
Okwa indila moshiwana opo shi mu yambidide noilonga yokuwapaleka opo a dule okukala ta mono oshimaliwa shokuyambidida ounona vaye neendenge daye, nomukulu waye.
Ova hokolola tava ti ova kala nokukonga omakwafo kombelewa ya kansela wavo, ndele ihava pewa sha.
Ova ti kutya kave na sha eengodi dopeke, onghee omakwafo ayeshe naa pewa kansela wavo.
Efiku Kundana a talela po eumbo lavo okwa li a ende pamwe nakansela woshikandjohoololo shaNyaanya Gideon Shikomba, omo kwa li a yandja oukutu voufila vavali nomaadi okulya keumbo laJohanna Jonas.
Kansela okwe va udanekela ta ti ombelelwa yaye otai ke va yambidida oikulya noidjalomwa.
Shikomba okwa ti kukeshe ou e na ehalo lokuyambidida nakwatafane lombelewa yaye ile konomola yongodi ya kansela, 0812803714.